Atyraýda bekire ósiretin jáne qara ýyldyryq óndiretin 8 kásiporyn ashylady

ATYRAÝ. QazAqparat – Atyraý oblysynda bekire balyǵyn ósiretin jáne qara ýyldyryq óndiretin 8 kásiporyn ashý josparlanyp otyr. Bul týraly Memleket basshysy Qasym-Jomart Toqaev Atyraý oblysy jurtshylyǵymen kezdesýinde málim etti, dep habarlaıdy QazAqparat Aqordanyń baspasóz qyzmetine silteme jasaı otyryp.

«Jaıyq jáne Qıǵash ózenderiniń tartylýy kúrdeli másele bolyp otyr. Qazir eki ózenniń saǵasyndaǵy sýdyń tereńdigi – nebári 30-40 santımetr. Bul jaǵdaı bekireniń ýyldyryq shashýyna kedergi keltirýde. Sondyqtan, Úkimet osy ózenderdiń saǵasyn tereńdetýdi qamtamasyz etýge tıis. Quzyrly mekemeler balyq qoryn saqtaý úshin brakonerlermen kúresti kúsheıtýi kerek. Bıyldyń ózinde oblysta osyǵan qatysty 2,5 myń ákimshilik jáne 52 qylmystyq is qozǵaldy. Zańsyz aýlanǵan 14 tonna balyq tárkilendi. Ókinishke qaraı, osyndaı zańsyzdyq tyıylmaı tur. Bul – tabıǵatty qorǵaýǵa jaýapty organdardyń jumysynda olqylyqtar bar degen sóz», - dedi Qasym-Jomart Toqaev.

Atyraý oblysynda bekire balyǵyn ósiretin jáne qara ýyldyryq óndiretin taǵy 8 kásiporyn ashý josparlanyp otyr.

«Atyraý oblysynda bekire balyǵyn ósiretin jáne qara ýyldyryq óndiretin eki sharýashylyq bar. 2025 jylǵa deıin osyndaı taǵy 8 kásiporyn ashý josparlanyp otyr. Mundaı sharýashylyqty damytý úshin qolaıly ınvestıtsııalyq ahýal qalyptastyrý kerek. Sondaı-aq, osy jumystardy atqaratyn balyq sharýashylyǵynyń mamandary qajet. Jastardy osy iske baýlyp, olarǵa jan-jaqty qoldaý kórsetý óte mańyzdy. Sonda ǵana jastar bul salaǵa qyzyǵady. Budan bólek, memleket tarapynan kómek kórsetilýi qajet. Osy aımaqta balyq sharýashylyǵyn damytý jergilikti bılik úshin basty mindettiń biri bolýǵa tıis. Úkimet bul másele boıynsha oblysqa barynsha qoldaý kórsetýi kerek», dep atap ótti Memleket basshysy.

Buǵan deıin QR Prezıdenti Atyraý oblysy munaı men gazdy tereń óńdeıtin ortalyqqa aınalýǵa tıis degen bolatyn.

Foto:api.elbrus.press