Atyraýda bekire balyǵy men qara ýyldyryǵyn saýdalaǵandar ustaldy
ATYRAÝ. QazAqparat - Atyraýda polıtsııa qyzmetkerleri brakonerlerge qarsy «Kedergi» operatsııasyn júrgizip, alǵashqy kúni-aq bekire balyǵy men qara ýyldyryǵyn tárkiledi, dep habarlaıdy «QazAqparat» HAA tilshisi.
«25 kg bekire balyǵy men 2 kg qara ýyldyryǵyn saýdalamaq bolǵan áıel ustaldy. Zańsyz júk tárkilendi. Atyraý - Oral kúre jolynda, Inder aýdanynda «Leksýs» markaly mashına toqtatylyp, onyń salonynan 800 kg sazan jáne 42 bekire balyǵy tabyldy. Osy faktiler boıynsha «Ósimdikter men janýarlardyń sırek kezdesetin jáne quryp ketý qaýpi tóngen túrlerimen jáne (nemese) olardyń bólikterimen jáne derıvattarymen, sondaı-aq alyp qoıylýyna tyıym salynǵan ósimdiktermen jáne janýarlarmen jáne (nemese) olardyń bólikterimen sondaı-aq derıvattarymen zańsyz is-áreketter» babyna sáıkes sotqa deıingi tergep-tekserý bastaldy», - dep habarlaıdy óńir ІІD baspasóz qyzmeti.
Eske sala ketsek, Qazaqstannyń bastamasymen Kaspıı mańy elderi kóldegi bekire, aqserke jáne qyzyl balyqtyń tym azaıyp ketýine baılanysty tabıǵı sý basseınderindegi bekire balyǵyn aýlaýǵa moratorıı jarııalaǵan bolatyn.
