Atyraýda batareıany jutyp qoıǵan bir jasar sábı kóz jumdy
ATYRAÝ. QazAqparat – Atyraýda teledıdar pýltiniń batareıasyn jutyp qoıǵan bir jasar sábıdiń ómirin qutqarý múmkin bolmady, dep habarlaıdy QazAqparat tilshisi.
Oblystyq densaýlyq saqtaý basqarmasynyń habarlaýynsha, sábı aýyr jaǵdaıda túsken. Ol qınalyp dem alǵan. Balanyń qandaı da bir zatty jutyp qoıǵany anyqtaldy. Dárigerler ony otasyz ádispen shyǵarmaq bolǵan. Ókinishke oraı, jutyp qoıǵan zaty úlkendeý bolǵandyqtan, ol ádis kómektespegen. Otanyń da kómegi tımedi. 11 aılyq náresteniń tynys alýy nasharlap, júrek aqaýynan kóz jumdy.
Oblystyq densaýlyq saqtaý basqarmasy balanyń jutyp qoıǵan zaty batareıa ekenin anyqtady.
