Atyraýda bata berý baıqaýy ótti
ATYRAÝ. QazAqparat - Atyraý oblysynda batagóı aqsaqaldar arasynda aımaqtyq baıqaý ótti. Sharanyń basty maqsaty bata berý dástúrin dáripteý, jańǵyrtý, keıingi urpaqqa úlgi etý, dep habarlaıdy QazAqparat.
Sharany Atyraý oblysynyń ákimdigi, «Ardagerler uıymy» respýblıkalyq qoǵamynyń oblystyq fılıaly, oblystyq tarıhı-ólketaný mýzeıi uıymdastyrdy. Jyl saıyn dástúrli túrde ótetin baıqaýǵa Batys Qazaqstan, Aqtóbe, Mańǵystaý jáne Atyraý oblystarynda ótken irikteý saıystarynda júldeli oryndarǵa ıe bolǵan 21 úmitker baq synasty.
Batagóıler «El esindegi batalar» taqyrybynda tarıhta esimi saqtalǵan tulǵalardyń batalaryn naqyshyna keltire oryndady. Al saıystyń ekinshi bóliminde qatysýshylar ulttyq salt-dástúrlerdiń bireýine óziniń batasyn berdi.
Baıqaýǵa «Ardagerler uıymy» respýblıkalyq qoǵamdyq birlestigi tóraǵasynyń birinshi orynbasary Ómirzaq Ozǵanbaev bastaǵan qazylar alqasynyń quramy qazylyq etti. Sonymen qatar, shara barysynda saıysqa túsýshi ardagerlerimizge aq jol tileý úshin arnaıy daıyndalǵan «Batamenen el kógerer» kitabynyń tusaýy kesildi.
Atalǵan kitapta Tóle, Qazybek, Áıteke bıler men sóz marjanyn mıras tutqan aqsaqaldardyń aq batalarymen qatar Atyraý oblysynda 2017 jyly ótkizilgen saıysqa qatysýshy qarııalardyń batalary toptastyrylǵan.
Baıqaý qorytyndysy boıynsha bas júldege Batys Qazaqstan oblysy, Qaratóbe aýdanynyń ardageri Ertaı Serdalın ıe boldy. Al, birinshi oryndy Atyraý oblysy, Isataı aýdanynyń ardageri Ýahıt Ádilov, ekinshi oryndy Inder aýdanynyń ardageri Moldabaı Berǵalıev pen Qurmanǵazy aýdanynyń ardageri Sabyrov Ǵalymjan, úshinshi oryndy Mańǵystaý oblysy, Jańaózen qalasynyń ardageri Taǵan Qumashev, Aqtóbe oblysynyń ardageri Marat Qabıjanov jáne Atyraý qalasynyń ardageri Aqmyrza Batyrqaıyrovtar ıelendi. 
Abaı Aqmurzıev
