Atyraýda bástesýden utylǵan jasóspirim polıtsııaǵa jalǵan habar bergen
ATYRAÝ. QazAqparat – Atyraýda ózara bástesýden utylǵan jasóspirim polıtsııaǵa jalǵan habar bergen, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, 25 sáýirde saǵat 01:00 shamasynda Aımurat esimdi turǵynnan «Juldyz» shaǵynaýdanynda tóbeles bolyp jatqany jóninde habar túsken.
«Polıtsııa qyzmetkerleri shaǵyn aýdandy tekserip, tóbeles bolmaǵanyn anyqtady. Keıin belgili bolǵandaı, kámeletke tolmaǵan úsh jasóspirim ózara bástesip, utylyp qalǵan 15 jastaǵy bala Aımurat degen jalǵan esimmen polıtsııaǵa habar bergen. Úsh jasóspirim habar bergen ýaqytta, túngi saǵat 23:00-den keıin zańdy ókilderiniń erip júrýinsiz turǵyn-jaıdan tys jerde bolǵan. Olardyń buryn dál osyndaı quqyqbuzýshylyq úshin ákimshilik jaýapqa tartylǵany anyqtaldy», -dep habarlady departamenttiń baspasóz qyzmeti.
Jalǵan habar bergen 15 jastaǵy jasóspirimniń ata-atasyna qatysty QR Ákimshilik quqyqbuzýshylyq týraly kodeksiniń 438-babynyń 3-bólimimen (Arnaýly qyzmetterdi kórineý jalǵan shaqyrý, osy baptyń birinshi jáne ekinshi bólikterinde kózdelgen, on tórtten on alty jasqa deıingi kámeletke tolmaǵandar jasaǵan áreketter), 442-babynyń 3-bólimimen (Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy) ákimshilik hattama toltyryldy. Sondaı-aq, úsh jasóspirimniń ata-anasyna 442-babynyń 3-bólimimen (Kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy. Osy baptyń birinshi jáne ekinshi bólikterinde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan áreketter) ákimshilik hattama jasaqtalyp, jınaqtalǵan is-qujattar zańdy sheshim qabyldaý úshin sotqa joldandy.
Eske sala ketelik, budan buryn Atyraýda jyl basynan beri kólik tizgindegen 15-ke jýyq jasóspirim ustalǵany https://kaz.inform.kz/news/atyrauda-zhyl-basynan-beri-kolik-tizgindegen-15-ke-zhuyk-zhasospirim-ustaldy_a3918982 habarlanǵan edi.
