Atyraýda bastaýysh synyp oqýshylaryna jaryqqa shaǵylysatyn bas kıim taratyldy
Oblystyq polıtsııa departamentiniń baspasóz qyzmetinen málim etkendeı, respýblıkalyq mańyzy bar tas joldardyń boıynda ornalasqan eldi mekenderdegi mektep oqýshylarynyń qaýipsizdigin qamtamasyz etý maqsatynda is-shara ótkizilgen.
«Polıtsııa qyzmetkerleriniń mindetiniń birine balalardyń qaýipsizdigin basty nazarda ustaý da kiredi. Sol sebepten, bastaýysh synyp oqýshylaryna jaryq shaǵylystyrǵysh bas kıimder, sómke men syrtqy kıimge arnalǵan arnaıy jabystyrǵyshtar taratyldy. Jalpy taldaýǵa sáıkes, kámeletke tolmaǵan jasóspirimder zardap shekken jol-kólik oqıǵalarynyń kópshiligi eldi mekenderdegi jol boıynda tirkeledi. Óıtkeni, aýyldardaǵy joldarda jaryq shamdary az, al, kólik júrgizýshileri mektep oqýshylaryn qarańǵyda baıqamaı qalady. Osynyń saldarynan balalar kóptep zardap shegedi», -deıdi jergilikti polıtsııa qyzmeti basqarmasynyń aǵa ınspektory, polıtsııa maıory Amanjol Jumalıev.
Baspasóz qyzmetiniń aqparatyna qaraǵanda, bıylǵy 10 aıda 286 jol-kólik oqıǵasy tirkelgen.
«Oblys aýmaǵyndaǵy jol-kólik oqıǵalarynyń saldarynan 78 adam mert boldy. Jol apatynan 340 adam ártúrli dene jaraqatyn aldy. Ótken jylmen salystyrǵanda jol-kólik oqıǵasy 17, adam ólimi 36, dene jaraqatyn alǵandar sany 18%-ǵa ósken. Osy kezeńde jasóspirimderdiń quralyn basqarýynyń saldarynan bolǵan 6 jol apaty tirkelip otyr. Jol apatynan 1 jasóspirim qaza taýyp, 9-y zardap shekken», -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda jyl basynan beri jol apatynan 78 adam mert bolǵanyn jazǵan edik.
