Atyraýda «Bastaý» túlegi úsh tildi oqý ortalyǵyn ashty
«Anar Muqanovanyń mamandyǵy – matematıka pániniń oqytýshysy. Bes jyl boıy Nazarbaev Zııatkerlik mektebinde jumys istegen. Keıin otbasy jaǵdaıyna baılanysty repetıtorlyqpen aınalysýyna týra kelgen. Bertin kele óziniń oqý ortalyǵyn ashýǵa bel býdy. Bıznes ıdeıasyn Kásipkerler palatasyna ákelip, osy jerde «Bastaý» jobasyna qatysty, bızneske qajetti aqparatty aldy», - dep málimdedi Atyraý oblysynyń kásipkerler palatasynyń baspasóz qyzmeti.
Jańadan ashylǵan «YS Education» oqý ortalyǵynda 60-qa jýyq bala oqıdy. Munda negizinen tabıǵı pánder oqytylady. Qazir tájirıbesi mol bes oqytýshy bar. Jas kásipker aldaǵy ýaqytta grantqa ótinim berip, bıznesin keńeıtpek.
Atyraý oblysy kásipkerler palatasynyń dırektory Abdolla Idresovtyń aıtýynsha, «Bastaý» jobasynyń túlekteri alǵashqy jyldary aýyl sharýashylyǵy men saýda salasyna ketken bolsa, endi birte-birte qyzmet kórsetý salasyn da qolǵa ala bastaǵan.
«Bıyl joba jospar boıynsha Atyraýda 1 900 adamdy qamtýy tıis. Sonyń 1 100-i oqyp shyqty. 272 adamǵa 709 mln teńge qarjy berildi. Sonyń ishinde «Eńbek» baǵdarlamasy arqyly somasy 61 mln teńgeden asatyn 141 grant berildi», - deıdi Abdolla Idresov.
Avtory: A. Sokolov
