Atyraýda basqarma basshysy jedel járdem brıgadasymen shaqyrtýlarǵa bardy
«15 sáýir kúni keshki 23:00-den bastap jedel járdem qyzmetkerlerimen birge shaqyrtýǵa shyqtym. Alǵashqy shaqyrtý patsıenttiń ómirine tikeleı qaýip tóndiretin, shuǵyl medıtsınalyq kómek talap etiletin I kategorııa bolǵandyqtan, atalǵan mekenjaıǵa jetýimizge 7 mınýttaı ýaqyt ketti. Alaıda, úıdiń esigi qulyptaýly bolyp, shaqyrtý bergen adam uıaly telefonyn kótermeı, jarty saǵatqa jýyq ýaqyt kúttik. Belgili bolǵandaı, sozylmaly holetsıstıtpen aýyratyn patsıent epıgastrıı aımaǵyna aýyrsyný sındromymen shaqyrtý túsirgen. Patsıent alkagoldi ishimdik paıdalǵan, aýrýhanaǵa barýdan bas tartty. Aýyrsynýdy basatyn dári ektik», - dep jazdy Densaýlyq saqtaý basqarmasynyń basshysy Qaısar Abdalıev Facebook-tegi paraqshasynda.
Onyń aıtýynsha, ekinshi shaqyrý júktiliktiń erte merziminde qan ketýmen baılanysty bolǵan. Shaqyrtýǵa barǵanda júkti áıel es-tússiz jatqan. Birden alǵashqy kómek kórsetip, aýrýhanaǵa jetkizilgen.
«Naýqastyń dárigerlerge ýaqytyly tekserilmegeni belgili boldy. Bul – tek eki shaqyrtýda oryn alǵan oqıǵalar. Al jedel járdem qyzmetkerleri táýligine 500-ge jýyq shaqyrtýǵa baryp, ártúrli qıyndyqty bastan keshiredi. Olar úshin adam densaýlyǵyn saqtaýda ár mınýt mańyzdy ekenin aıtqym keledi. Keı jaǵdaılarda naýqastar tarapynan da keleńsiz oqıǵalar oryn alady. Jurtshylyq jedel járdem qyzmetine kóńili tolmaıtynyn aıtady. Biraq 103 medıtsınalyq qyzmet túrine negizsiz júginetinderdiń qatary da kóp. Sol sebepten, jedel járdem qyzmetkerleriniń jumysyna túsinistikpen qaraýǵa shaqyramyn», - dedi Qaısar Abdalıev.
Endi basqarma basshysy aı saıyn jedel járdem qyzmetkerlerimen birge shaqyrtýǵa shyǵýdy qolǵa almaq.
Eske sala ketelik, Qaısar Abdalıev Atyraý oblystyq Densaýlyq saqtaý basqarmasynyń basshysy bolyp bıylǵy 6 sáýirde taǵaıyndaldy.