Atyraýda bankten 12 mln teńge urlaǵan ınjener ustaldy
ATYRAÝ. QazAqparat - Atyraýda iri kólemde qarjy jymqyrǵan ınjener-baǵdarlamashy ustaldy, dep habarlaıdy QazAqparat Atyraýdyń kóliktegi polıtsııasy departamentine silteme jasap.
«26 sáýir kúni Atyraý stantsııasyndaǵy polıtsııanyń jelilik bólimine ekinshi deńgeıli bankterdiń birinen «Atyraý halyqaralyq áýejaıy» AQ tıesili 12 000 000 (on eki mıllıon) teńgeniń urlanǵany týraly aqparat kelip tústi. Jedel izdestirý sharalary arqyly kóliktegi polıtsııa qyzmetkerleri kúdiktini tapty. Ol «Atyraý halyqaralyq áýejaıy» AQ jumys isteıtin 23 jastaǵy ınjener-baǵdarlamashy bolyp shyqty», - delingen polıtsııa habarlamasynda.
Tekserý barysynda kúdiktiniń Atyraý halyqaralyq áýejaıy esepshotynan iri kólemdegi qarajatty qasaqana óz tanysynyń esepshotyna aýdarǵany jáne sol kúni aqshany esepshottan shyǵarǵany anyqtaldy.
«Atalǵan fakt QR Qylmystyq kodeksiniń 188-baby, 4-bóligi 3-tarmaǵy boıynsha (Urlyq, asa iri kólemde) sotqa deıingi tergeýdiń biryńǵaı reestrine tirkeldi. Atyraý oblysy qylmystyq ister boıynsha arnaıy mamandandyrylǵan aýdanaralyq sotynyń úkimimen kúdikti qylmystyq is jasaýda aıypty dep tanyldy jáne 5 jylǵa bas bostandyǵynan aıyryldy», - delingen habarlamada.
