Atyraýda balyqtardyń qyrylýy: Jedel top quryldy
ASTANA. QazAqparat - Atyraý oblysynda balyqtardyń jappaı qyrylýyn anyqtaý maqsatynda sýdan jáne óli balyqtan synama alyndy. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.
Onyń atap ótýinshe, 8 shilde kúni QR AShM Orman sharýashylyǵy jáne janýarlar álemi komıteti Atyraý oblystyq aýmaqtyq ınspektsııasyna Jylyoı aýdanyna qarasty Turǵyzba aýylynyń tusyndaǵy Jyńǵyldykól ózeniniń boıynsha balyqtardyń jappaı qyrylǵandyǵy týraly aqparat túsken.
«Osyǵan oraı jedel top qurylyp, onyń quramyna aýmaqtyq orman sharýashylyǵy jáne janýarlar álemi ınspektsııasynyń, jergilikti atqarýshy organdardyń, sý ınspektsııasynyń, ekologııa, veterınarlyq qyzmet jáne ǵylymı uıymdardyń ókilderi kirdi. Jedel top zerthanalyq jaǵdaıda saraptama júrgizý úshin sýdan jáne óli balyqtardan synama aldy. Saraptamanyń nátıjesinde balyqtardyń jappaı qyrylý sebebi anyqtalady. Aýmaqtyq ınspektsııa qyzmetkerleri jergilikti atqarýshy organ ókilderimen birge óli balyqtardy jınaý jáne joıý jumystaryn uıymdastyrdy», - dep jazady ol.
Sáken Dildahmettiń atap ótýinshe, óńirdegi sý men aýa temperatýrasynyń joǵary bolýyna baılanysty sý qoımalary jiti baqylaýǵa alynǵan jáne balyqtardyń taǵy da jappaı qyrylýyna jol bermeý úshin naqty sharalar ázirlengen.
