Atyraýda balyq qoryna qol suqqandarǵa qatysty 57 qylmystyq is qozǵaldy
ATYRAÝ. QazAqparat – Atyraý oblysynyń polıtseıleri jyl basynan beri balyq qoryna zańsyz qol suqqandarǵa qatysty 57 qylmystyq is qozǵady, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, polıtseıler bıylǵy 6 aıda balyq qoryn qorǵaýǵa qatysty quqyq buzýshylyqty tómendetýge qol jetkizgen.
«Mundaı oń nátıjege brakonerlik úshin jaýapkershiliktiń qatańdatylýy oń yqpalyn tıgizdi. Sonymen birge, karantın rejımin saqtalýyn qamtamasyz etý maqsatynda júrgizilgen is-sharalarǵa da baılanysty bolyp otyr» deıdi oblystyq polıtsııa departamentiniń bastyǵy Qamza Úmbetqalıev.
Onyń málim etýinshe, jyl basynan beri júrgizilgen profılaktıkalyq is-sharalar kezinde tabıǵat qorǵaý zańnamasy 337 márte buzylǵan. Onyń 305-i balyq qoryna qol suǵýǵa qatysty bolǵan. Osyǵan baılanysty polıtsııa qyzmetkerleri 57 qylmystyq is qozǵaǵan. QR Ákimshilik quqyq buzý kodeksiniń 383-babymen 276 hattama toltyrylǵan.
Quqyq buzýshylarǵa 3 mln teńgeden astam aıyppul salynyp, 1,5 mln teńgeden astamy óndirilgen. Zańsyz saýda aınalymynan 9 tonnadan astam balyqty tárkiledi. Onyń ishinde bekire tuqymdas baǵaly balyqtyń 999 kelisi bar. Sondaı-aq, 284 aý men 2 qaıyq bar.
Eske sala ketelik, budan buryn Atyraý polıtsııasy jarty tonnadan astam bekire tıegen kólikti ustaǵan edi.
