Atyraýda balyq aýlaıtyn mekemelerge baqylaý kúsheıedi
ASTANA. QazAqparat - Oblystyq aýmaqtyq orman sharýashylyǵy jáne janýarlar álemi ınspektsııasy balyq aýlaıtyn kooperatıvterdiń kúzgi maýsymda lımıtti ıgerýleri úshin shara qoldandy. Bul týraly QazAqparat Atyraý oblystyq óńirlik kommýnıkatsııalar qyzmetine silteme jasap habarlaıdy.
Atyraý oblysynyń ákimi Nurlan Noǵaevtyń tóraǵalyǵymen ótken balyq sharýashylyǵyn damytý máselesine arnalǵan kóshpeli jınalysta oblystyq aýmaqtyq orman sharýashylyǵy jáne janýarlar álemi ınspektsııasynyń basshysy Danııar Baımaǵambetov kúzgi balyq aýlaý maýsymynda barlyq sý aıdyndary men balyq qabyldaý bólimsheleri qatań baqylaýda bolǵanyn aıtty. Sonyń nátıjesinde balyq sharýashylyǵy sýbektileriniń kvotany ıgerýi sońǵy 8 jylda alǵash ret 87,3 %-ke jetti.
Atyraý oblysy ákiminiń qatysýymen Qurmanǵazy aýdanynda ótken aımaqtaǵy balyq sharýashylyǵyn damytý problemalaryna arnalǵan kóshpeli jınalysta osyndaı málimetter aıtyldy.
«Alǵa qaraı da brakonerlikpen kúresti tıimdi júrgizý úshin balyq aýlaýǵa memlekettik baqylaý mehanızmin jetildirip, zańsyz balyq aýlaýshylardy erkimen jiberetin amal-aılalardy quryqtaý kerek. Salada «bolmashy» kvotamen júrý sekildi uıymdastyrýshylyq-quqyqtyq problemalar týraly aıtyp otyrmyn. Eki jyl qatarynan kvotanyń 50%-yn ıgermegenderge qaıtyp mundaı múmkindik bermeý kerek», - dedi Danııar Baımaǵambetov.
Atyraý oblysynyń ákimi Nurlan Noǵaevtyń aıtýynsha, qazir resmı aýlanǵan balyq kólemi 10 myń tonna bolyp otyr, al beıresmı málimet budan kóp ekeni sózsiz.
«Men kooperatıvterdiń zańsyz balyq aýlaýdy qoldap otyrǵanyn naqty aıta alamyn. Sizder zańdy qataıtý kerek deısizder, biraq brakonerlerdiń qylmystyq jolmen aýlaǵan balyqtaryn qabyldaısyzdar. Bulaı bolmaıdy. Jaýapty adamdar aımaqtaǵy barlyq balyq aýlaıtyn mekemelerge baqylaýdy kúsheıtýleri qajet», - dedi Nurlan Noǵaev.
Aımaq basshysy brakonerlerden tárkilengen kólik quraldaryna qatysty másele áli kúnge deıin zańdy turǵyda rettelmegenine toqtaldy. Jınalys barysynda tárkilengen kólikterdi zańsyz dep taýyp, joıý týraly másele qaraldy.
Aıta keteıik, ótken jyly sý polıtsııasy men oblystyq aýmaqtyq orman sharýashylyǵy jáne janýarlar dúnıesi ınspektsııasy eki myńnan astam zań buzýshylyqty anyqtaǵan, 125 qylmystyq is júrgizilip, 35 mln teńgege jýyq aıyppul tólendi. Zańsyz aınalymnan 107 tonna balyq alyndy, onyń 2 735 tonnasy bekire tuqymdas balyqtar.
