Atyraýda balyq aýlaýǵa ketken jigit úsh kúnnen beri tabylmaı jatyr

ATYRAÝ. QazAqparat – Atyraýda balyq aýlaýǵa barǵan jigit úsh kúnnen beri tabylmaı jatyr, dep habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, 36 jastaǵy jigit 10 qyrkúıekte iz-túzsiz joǵalyp ketken.

«Joǵalǵan jigittiń aty-jóni – Erbol Qusaıynov. Týystarynyń aıtýynsha, ol 10 qyrkúıek kúni dostarymen birge balyq aýlaýǵa ketip, úıine qaıtyp oralmaǵan. Ony izdestirý jumysy búgin úshinshi kún qatarynan jalǵasyp jatyr. Іzdeý jumysyna Atyraý oblysy polıtsııa jáne tótenshe jaǵdaılar departamentteriniń qyzmetkerleri, Ulttyq ulannyń 80 sarbazy tartyldy», - dep habarlady departamenttiń baspasóz qyzmeti.

Sondaı-aq, kınologııa bólinisteri men súńgýirler de izdeý jumystaryna jumyldyrylǵan.

«Atyraý oblysynyń turǵyndary men qonaqtaryna áleýmettik jelide alyp-qashpa aqparattardy taratpaýdy eskertemiz. Joǵalǵan jigitke qatysty derekter bolsa, 102 operatoryna habarlaý suralady», - dep málim etti departamenttiń baspasóz qyzmeti.

Eske sala ketelik, budan buryn Atyraýda iz-túzsiz joǵalǵan 33 jastaǵy jigit bir aptadan beri tabylmaı jatqanyn jazǵan bolatynbyz.

Keıin ol sharýa qojalyǵynan tabyldy.