Atyraýda balalarynyń kózinshe ishimdik ishken áıeldiń quqyǵy shekteledi
ATYRAÝ. QazAqparat – Atyraýda balalarynyń kózinshe ishimdik ishken áıeldiń quqyǵy shekteledi, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, 21-23 sáýirde «Januıa jáne bala» jedel aldyn alý is-sharasy ótkizilgen.
Іs-shara kezinde ıývenaldy polıtsııa bóliminiń ınspektorlary «jaısyz otbasy» sanatynda esepte turǵan tulǵalardyń turmystyq jaǵdaıyn zerdelep, túsinik jumysy júrgizilgen.
«Máselen, 21 sáýir saǵat 16:00 shamasynda Atyraý qalasynyń turǵyny 102 operatoryna habarlasyp, Saraıshyq kóshesindegi úılerdiń birinde turatyn jastaǵy áıeldiń kámeletke tolmaǵan balalarynyń tárbıesimen aınalyspaı júrgeni týraly habar bergen. Atalǵan derekti tekserý kezinde 1976 jyly týǵan azamatshanyń kámeletke tolmaǵan balalarynyń kózinshe alkogoldi ishimdik iship, bala tárbıesimen aınalyspaǵany anyqtaldy. Bul áıel bıylǵy qańtarda «jaısyz otbasy» esebine alynǵan. Onyń tárbıesinde 12 jáne 17 jastaǵy balalary bar. Osy ýaqytqa deıin áıel dál osyndaı ákimshilik quqyqbuzýshylyq jasaǵany úshin ákimshilik jaýapkershilikke tartylǵan» dep habarlady departamenttiń baspasóz qyzmetinen.
Balalarynyń tárbıesine keri áser etetin is-áreketterdi jasap, kámeletke tolmaǵan balalaryn tárbıeleý men oqytýdaǵy ata-analyq mindetin oryndamaǵan áıelge QR Ákimshilik quqyq buzý kodeksiniń 127-babynyń 2-bólimimen ákimshilik hattama toltyrylǵan.
Endi jınaqtalǵan is-qujattar atalǵan azamatshanyń ata-analyq quqyǵyn shekteý týraly usynyspen sheshim qabyldaý úshin Atyraý qalalyq ákimdigi janyndaǵy kámeletke tolmaǵandardyń quqyǵyn qorǵaý komıssııasyna joldanady.
Eske sala ketelik, budan buryn Atyraýda joǵalǵan 8 jasar qyzdyń mektepte oqymaǵanyn jazǵan bolatynbyz.
