Atyraýda balalarǵa arnalǵan veloortalyq ashyldy
ATYRAÝ. QazAqparat - Atyraýda balalarǵa arnalǵan veloortalyq ashyldy, dep habarlaıdy QazAqparat tilshisi.
Atyraý oblystyq sport basqarmasynyń baspasóz hatshysy Іlııas Shaıhıevtiń aıtýynsha, Nursaıa shaǵynaýdanyndaǵy №48 úıdiń astynan ashylǵan veloortalyqtyń qurylysy tolyqtaı aıaqtalyp, alǵashqy daıarlyq tobyna balalar qabyldandy. Qazirgi tańda 10-15 jas aralyǵyndaǵy 30-dan astam bala jattyǵýlarǵa kirisip ketti. Ol úshin Taldyqorǵan qalasynan arnaıy bilikti jattyqtyrýshy Erbol Bederbekov shaqyrtylǵan.
Oqý-jattyǵý velotrenajerlarda ótkiziledi. Búginde demeýshilerdiń kómegimen «Venu» markaly 50 trenajer satyp alynǵan.
«Jańa ortalyq bolashaq Olımpıada oıyndarynyń júldegerlerin daıyndap shyǵatyn »chempıondar sheberhanasyna« aınalatynyna senemin. Qazirgi tańda balalar úshin qajetti jaǵdaılar tolyqtaı jasalǵan», - deıdi Sport basqarmasynyń basshysy Rınat Ibragımov.
Aıta ketý kerek, aldaǵy ýaqytta Beıbarys, Qurmanǵazy, Amandosov kóshelerinde jalpy uzyndyǵy 24 shaqyrymdy quraıtyn velojol tóseledi dep josparlanýda.
