Atyraýda balalardy ońaltý ortalyǵy ashyldy
ATYRAÝ. QazAqparat - «Elbasy Nursultan Nazarbaevtyń qatysýymen «Táýelsizdik jolyn jalǵastyrar urpaq» atty respýblıkalyq forým ótti. Oǵan oblys ákimi Mahambet Dosmuhambetov qatysty», dep habarlaıdy Atyraý oblystyq kommýnıkatsııalar qyzmeti.
Atalǵan forým aıasynda Elbasy qorynyń qoldaýymen Atyraý oblystyq balalar aýrýhanasy janynan balalardy ońaltý ortalyǵy paıdalanýǵa berildi. Aıtalyq, mundaı ońaltý ortalyǵy óńirde buryn bolmaǵan.
Ońaltý ortalyǵy – erekshe qajettilikteri bar balalarǵa qoldaý kórsetýge baǵyttalǵan Elbasynyń «Qamqorlyq» áleýmettik-mańyzdy bastamasynyń bir bóligi. Bul ǵımarat balalardyń dene, aqyl-oı qabiletterin damytý, olardy praktıkalyq ómirlik daǵdylarǵa úıretý sııaqty mańyzdy mindetterdi sheshýge yqpal etpek.
Zamanaýı medıtsınalyq qural-jabdyqtarmen jabdyqtalǵan ortalyqtyń kómegine júginýshilerge 21 maman medıtsınalyq ońaltýdyń 2-3 kezeńi boıynsha kómek kórsetedi. Sondaı-aq munda aıyna 50 bala, jylyna 600 balany qabyldaý kózdelip otyr. Balalarǵa kórsetiletin ońaltý kýrsy 21 kúnnen turady.
Shara sońynda óńir basshysy Mahambet Dosmuhambetov «El úmiti» sheńberinde «Myń bala» ulttyq olımpıadasy men «Elbasy medali» jobalaryna qatysyp eń úzdik dep tanylǵan jeńimpazdardy marapattady. Olarǵa QR Tuńǵysh Prezıdenti, Elbasy qory men «Elbasy akademııasy» korporatıvtik qorynyń atynan arnaı medal men noýtbýk tabys etildi.
Aıta keteıik, «Elbasy medali» jobasyna oblys boıynsha 332 adam qatysyp, onyń 30 qatysýshy «Qola medal» deńgeıi boıynsha marapattaldy.
Al, «Myń bala» ulttyq olımpıadasynyń qorytyndysymen 49 oqýshy jeńimpaz bolyp shyqty. Olar óz bilimderin jergilikti jerdegi daryndy balalarǵa arnalǵan mektepterde ári qaraı jalǵastyrý múmkindigin aldy.
Eske sala keteıik, olımpıadanyń І kezeńine 12 470 atyraýlyq oqýshy qatysqan bolatyn.
