Atyraýda balalar úıindegi uryp-soǵý deregin arnaıy komıssııa tekserip jatyr
Atyraý oblysy ákiminiń orynbasary Jasulan Bısembıevtiń aıtýynsha, «Shańyraq» otbasylyq úlgidegi balalar aýylynda 57 tárbıelenýshi bar.
«Balalardyń quqyǵyn shekteý degen másele týyndamaýy kerek. Biz bul máselege erekshe nazar aýdaryp otyrmyz. Qazir oblystyq bilim basqarmasy janynan arnaıy komıssııa quryldy. Komıssııa quramyndaǵy psıhologtar ár balamen jeke áńgimelesip, tekserý júrgizip jatyr. Balalardyń psıhologııalyq jaǵdaıyna baǵa beriledi. Pedagogıkalyq quramnyń tárbıe jumysyna saraptama jasalady. Arnaıy komıssııanyń tekserý qorytyndysy týraly keıin habarlaımyz», -dep málim etti Jasulan Bısembıev.
Aıta keteıik, áleýmettik jeli qoldanýshysy Dına Tańsári Atyraýdaǵy «Shańyraq» balalar úıinde tárbıelenýshiler soqqyǵa jyǵylatyny týraly jazba qaldyrǵan edi.
«Balany urǵan. Ol bul týraly balalarǵa arnalǵan senim telefonyna habarlaǵan. Komıssııa kelip, eshqandaı zań buzýshylyq tappaıdy. Bul az bolǵandaı, komıssııa dırektordyń ózi balalar úıin tekserýi kerek dep habarlaıdy. Komıssııa balalardyń shaǵymdaryn múldem elemeıdi. Bes jasar qyzdy da urǵan», - dep jazdy ol.
Eske sala ketelik, budan buryn Atyraýda balalar úıindegi uryp-soǵý deregine baılanysty tergeý bastalǵanyn habarlaǵan bolatynbyz.
Oblystyq polıtsııa departamenti baspasóz qyzmetiniń aqparatyna qaraǵanda, áleýmettik jelide jarııalanǵan balalar úıi tárbıelenýshilerin uryp-soǵý deregine baılanysty sotqa deıingi tergeý júrip jatyr.
«Áleýmettik jelide taralǵan balalar úıindegi derekterge qatysty QR Qylmystyq kodeksiniń 140-baby 1-bóligimen (kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý amaldary júrgizilip jatyr. Ózge aqparat QR Qylmystyq-protsestik kodekstiń 201-babyna sáıkes jarııalaýǵa jatpaıdy», -dep habarlady departamenttiń baspasóz qyzmeti.
