Atyraýda balalar aýrýhanasyna 126 mln teńgeniń úsh preparaty satyp alyndy
Oblystyq balalar aýrýhanasy baspasóz qyzmetiniń aqparatyna qaraǵanda, Nýsınersen (Spınraza) preparatynyń bireýi 42 mln teńge turady.
«Nýsınersen preparaty omyrtqadaǵy julynnyń bulshyq et atrofııasyn emdeýge arnalǵan. Eritindi omyrtqaǵa egiledi. Julynnyń bulshyq et atrofııasy nemese SMA – julynnyń aldyńǵy múıizderindegi motorly neırondarynyń údemeli degeneratsııasynan týyndaǵan genetıkalyq geterogendi tuqym qýalaıtyn, ári emdelmeıtin aýrý. Basqasha aıtqanda, adamnyń bulshyq etteri múldem jumys istemeı qalady. Al, Nýsınersen (Spınraza) preparaty osyndaı syrqatqa shaldyqqan balalardyń ómirin edáýir jeńildetedi», -dep habarlady balalar aýrýhanasynyń baspasóz qyzmeti.
Eske sala ketelik, buǵan deıin Atyraý perzenthanasyna shala týǵan náresteni jetildirýge arnalǵan qurylǵylar berilgen edi.
Atyraý qalalyq perzenthanasynyń dırektory Gúlzınep Dúsipovanyń aıtýynsha, medıtsınalyq qurylǵylar – shala týǵan balalardyń qarqyndy terapııasyna arnalǵan ınkýbator jáne ashyq reanımatsııalyq júıe.
«Mundaı medıtsınalyq jabdyqtarmen keminde 1 350 balanyń ómirin saqtap qalýǵa jol ashylady. Bizdiń perzenthanadaǵy júkti analarǵa jedel jáne sapaly medıtsınalyq kómek kórsetý úshin týǵan náresteler patologııasy bólimshesi reanımatsııalyq jabdyqqa zárý edi. Endi bizdiń neonatolog-dárigerler men reanımatologtar ómirge kelgen nárestelerge kútim jasaýǵa, fýnktsıonaldyq densaýlyǵyn saqtaýǵa kómektesetin zamanaýı jabdyqtar jıyntyǵymen jumys isteıdi», -deıdi perzenthana dırektory Gúlzınep Dúsipova.
Perzenthanaǵa berilgen zamanaýı medıtsınalyq jabdyqtar demeýshilik kómekpen alynǵan. Jańa jabdyqtardyń quny – 9,5 mln teńge.