Atyraýda balabaqshalardy ashady
ATYRAÝ. QazAqparat – Atyraýda mektepke deıingi balalar mekemeleri ashylyp, azyq-túlik emes taýarlar satatyn dúkender jumysyn bastaıdy, dep habarlaıdy QazAqparat.
Atyraý oblysynyń bas sanıtarlyq dárigeri Temirbek Musaǵalıevtiń qaýlysyna sáıkes, 18 mamyrdan bastap mektepke deıingi balalar mekemeleri, jazylý arqyly 5 adamnan aspaıtyn repetıtorlyq, tildik jáne ózge de úıirmelerdiń jumys isteýine ruqsat berilip otyr. Sondaı-aq, aýdany 2 myń sharshy metrden aspaıtyn azyq-túlik emes taýarlar satatyn dúkender de ashylady.
Atalǵan kásipkerlik nysandarynyń barlyǵy tańerteńgi saǵat 10:00-den keshki 18:00-ge deıin jumys isteıtin bolady.
Al, 20 mamyrdan bastap menshik nysanyna qaramastan barlyq balabaqshalarda kezekshi toptardy uıymdastyrýǵa ruqsat berildi. Balabaqshalarǵa balalardy ákelý úshin ata-anasynyń ekeýi de, nemese qamqorshylary men asyrap alýshylar jumys isteıtini týraly anyqtamany kórsetýi tıis.
