Atyraýda balabaqsha kezegine onlaın rejimde tirkeýge bolady

 ATYRAÝ. QazAqparat  - Atyraý turǵyndaryna endi búldirshindi balabaqshaǵa tirkeý jáne kezegin bilý úshin HQO men qalalyq bilim berý bóliminde uzyn-sonar kezekke turýdyń qajeti joq, dep habarlaıdy QazAqparat tilshisi  Atyraý qalalyq ákimdiginiń baspasóz qyzmetine silteme jasap.

2018 jylǵy 5 qyrkúıekten bastap Atyraýda garden.atyrau.gov.kz saıty jumys isteı bastady, munda onlaın rejimde balabaqshany tańdaýǵa, ol týraly tolyq aqparat alýǵa, mektepke deıingi mekemelerge kezegin qadaǵalaýǵa, sondaı-aq SMS nemese e-mail - habarlama arqyly keri baılanys alýǵa bolady.

Qalalyq bilim bólimi basshysynyń mindetin atqarýshy Almabek Abdolovtyń aıtýynsha, saıt ata-analardyń ýaqytyn únemdeýge, sybaılas jemqorlyq táýekelin jáne qalalyq bilim bólimi mamandarymen jeke baılanys jasaýdy boldyrmaýǵa kómektesedi.

«Búgingi kúni Atyraý qalasyndaǵy 42 memlekettik balabaqshada 13 219 oryn bar, onyń 1141-i bos. Ata-analar barlyǵy  24 925 aryz bergen. Onyń ishinde kezekte turǵandar - 22 408, jeńildik sanatyndaǵy azamattar - 2 517», - dedi Almabek Dúısenbaıuly.

Sonymen qatar,  saıtta qaladaǵy barlyq balabaqshalardyń tolyq tizimi, aryzdardyń kezegi, bos oryndar bıýlleteni, alynǵan joldamalardyń jıyntyǵy ornalastyrylǵan. Ata-analar úıden shyqpaı-aq balabaqshaǵa kezegin tekserip, joldama ala alady.Bul jerde sondaı-aq jekemenshik balabaqshalardyń tizimi jáne olardaǵy oryndar men bos oryndardyń sany týraly aqparat ta ornalastyrylǵan.