Atyraýda Baqytgúl Hamenovaǵa qatysty sot ótip jatyr
Búgin, 11 tamyzda Atyraýda oblys ákiminiń orynbasary Baqytgúl Hamenovaǵa, Atyraý oblysy mádenıet, tilderdi damytý jáne arhıv isi basqarmasynyń basshysy Aqylbek Rysqalıevke jáne «Balqytý» JShS dırektory Ómirtaı Adamovqa qatysty sot protsesi bastaldy.
Sot Atyraýdaǵy №2 qalalyq sotta ótip jatyr.
Baqytgúl Hamenova men Aqylbek Rysqalıevtyń isi QR Qylmystyq kodeksiniń 366-babynyń 3-bóliginiń 3-tarmaǵymen tergelgen. Al, «Balqytý» JShS dırektory Ómirtaı Adamov QR Qylmystyq kodekstiń 367-babynyń 2-bóligimen tergeýge alynǵan.
Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan para aldy degen kúdikpen ustaldy. Ol byltyrǵy jeltoqsan aıynda ustalyp, tergeý ızolıatoryna qamaýǵa alyndy.
Baqytgúl Hamenova 2020 jyldyń naýryz aıynda Atyraý oblysy ákiminiń orynbasary bolyp taǵaıyndalǵan edi. Ol bul taǵaıyndaýǵa deıin altynshy saılanǵan Parlament Májilisiniń depýtaty bolǵan.
Eske sala ketelik, budan buryn Baqytgúl Hamenovaǵa qatysty sot otyrysy 11 tamyzǵa aýystyrylǵanyn jazǵan edik.
