Atyraýda Baqytgúl Hamenovaǵa qatysty sot qaıta jalǵasty

ATYRAÝ. QazAqparat – Atyraýda oblys ákiminiń burynǵy orynbasary Baqytgúl Hamenovaǵa qatysty sot qaıta jalǵasty. Onymen birge oblystyń mádenıet, tilderdi damytý jáne arhıv isi basqarmasynyń basshysy Aqylbek Rysqalıev pen «Balqytý» JShS-niń dırektory Ómirtaı Adamov kúdikke ilingen, dep habarlaıdy QazAqparat.

Sot otyrysy Atyraýdaǵy №2 qalalyq sotta ótip jatyr.

Baqytgúl Hamenova men Aqylbek Rysqalıevtiń isi QR Qylmystyq kodeksiniń 366-baby 3-bóliginiń 3-tarmaǵymen tergelgen. Al «Balqytý» JShS dırektory Ómirtaı Adamov QR Qylmystyq kodeksiniń 367-baby 2-bóligimen tergeýge alynǵan.

Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan para aldy dep aıyptalyp otyr. Tergeý málimetinshe, Abaı Qunanbaıulyna quny 145 mln teńge bolatyn eskertkish ornatýǵa memtapsyrys kelisimshartyn jasasý úshin JShS basshylyǵynan 4,5 mln teńge para alǵan.

Búgingi sot otyrysynda «Asyl ólke» qoǵamdyq birlestiginiń tóraǵasy Orynsha Mákeeva kýáger retinde jaýap berdi.

Onyń aıtýynsha, «Uly ulys – Altyn Orda» respýblıkalyq konferentsııasyn ótkizer aldynda ony B.Hamenova shaqyryp, is-sharany ótkizýge demeýshiler arqyly qarajat tabýdy tapsyrǵan.

«Maǵan 231 490 511 teńge kóleminde qarajat tabý kerek boldy. Men demeýshi izdedim. Bul soma is-sharada qyzmet kórsetetin «Kerim medıa» kompanııasyna qajet edi. Bul týraly Baqytgúl Hamenova da, Aqylbek Rysqalıev te bildi. Bul bizdiń aramyzda qupııa bolǵan joq. Óıtkeni, bul týraly oblys basshylyǵyna da belgili boldy», - dedi Orynsha Mákeeva.

Budan buryn sotta Baqytgúl Hamenova ózine taǵylǵan aıyppen kelispeıtinin málim etken edi. Onyń isine qatysty aıyptaý aktisi 55 betti quraǵan.

Keıin B.Hamenovaǵa qatysty sot 5 qyrkúıekte qaıta jalǵasatynyn jazǵan bolatynbyz.