Atyraýda azyq-túlik baǵasynyń ósýine deldaldar sebep bolýda
Oblystyq kásipkerlik jáne týrızm basqarmasynyń basshysy Nurbol Jańabekovtiń málimetinshe, arnaıy komıssııa azyq-túlik ónimderin satýdyń deldaldyq tizbegin anyqtaý úshin 16 otyrysy ótken.
«Komıssııa otyrystarynyń nátıjesinde dúkenderge áleýmettik mańyzy bar sary maı, taýyq eti jáne sút ónimderin jetkizetin deldaldar ústeme baǵa 15%-dan asyryp jibergeni anyqtaldy. Máselen, keıbir kásipkerler sary maıǵa 82,104% ústeme baǵa qosyp, sýpermarket jelilerine satqan. Atalǵan kásipkerlik sýbektisi – deldalmen aqparattyq-túsindirý jumysy júrgizildi. Al, byltyrǵy qarasha-jeltoqsan aılarynda oblysta tuz baǵasy kúrt óskeni belgili boldy. Shetelden jáne basqa óńirlerden tasymaldaýǵa baılanysty logıstıkalyq shyǵyndar esebinen tuz baǵasy 60 teńgeden 76 teńgege deıin jetti. Alaıda, qazir saýda nysandarynda aıtarlyqtaı logıstıkalyq shyǵyndardy talap etpeıtin jergilikti tuz orta eseppen 47-55 teńgeden satylyp jatyr», -dep habarlady Nurbol Janabekov.
Onyń aıtýynsha, azyq-túlik baǵasyn negizsiz ósirgen deldaldarǵa, jalpy quqyq buzýshylyq jasaǵan adamdarǵa eskertý berilgen. Mundaı jaıt qaıtalanatyn bolsa, tıisti zańdylyqqa sáıkes aıyppul salynady.
«Áleýmettik mańyzy bar azyq-túlikterdiń baǵasyna qosylatyn ústeme baǵa 15%-dan aspaýy tıis. Eger ústeme baǵany bul shekten asyp ketetin bolsa, onda oǵan jaýapty tulǵa QR «Saýda qyzmetin retteý týraly» zańynyń 9-babynyń 2-tarmaǵyna sáıkes jaýapqa tartylady», -dep málim etti Nurbol Jańabekov.
Eske sala ketelik, Atyraý oblysynyń kásipkerlerine 1,9 mlrd teńgeniń sýbsıdııasy beriletinin habarlaǵan edik.