Atyraýda azyq-túlik baǵasyn turaqtandyrý úshin qaıtarylatyn qaryz berildi
«Atyraý» ÁKK» AQ-nyń departament dırektory Dmıtrıı Dıýdiń aıtýynsha, jergilikti saýda jelilerine jáne kókónis ónimderin óndirýshilerge aınalym qarajatyn tolyqtyrý úshin qaıtarylatyn qaryz berilip otyr. Qaryz alǵan kásipkerler eki jyl boıy áleýmettik mańyzy bar azyq-túlikterdiń baǵasyn turaqty ustaýdy mindetine alady.
«Kásipkerlerge qaıtarylatyn qaryz 2022-2023 jyldarǵa arnalǵan baǵany turaqtandyrý baǵdarlamasyn júzege asyrý úshin berilip otyr. Qazir óńirde turaqtandyrý qory arqyly áleýmettik mańyzy bar azyq-túlik taýarlarynyń 18 túri shekti jáne shekti ruqsat etilgen bólshek saýdadaǵy baǵadan aspaıtyn, sondaı-aq naryqtyq qunynan ortasha alǵanda 21%-ǵa tómen baǵamen satylyp jatyr. Turaqtandyrý qoryna 3 041,4 tonna azyq-túlik taýarlary, onyń ishinde 1 953 tonna aýyl sharýashylyǵy ónimi jetkizildi. Bul oblys tutynýshylaryn 2023 jyldyń mamyr aıyna deıin qamtamasyz etýge jetedi. Kartop, pııaz, sábiz, qyryqqabat sııaqty aýyl sharýashylyǵy ónimderi qalanyń 4 bazary men 4 saýda pavılonynda satylady. Kartop «ıArmarka» sýpermarketiniń 11 saýda jelisinde satylymǵa qoıyldy», -deıdi Dmıtrıı Dıý.
Onyń málimetine súıensek, aýyl sharýashylyǵy taýarlary naryqtaǵy baǵasynan ortasha 42%-ǵa tómen baǵamen satylymǵa shyǵarylǵan. Al, 481,9 tonna kólemindegi áleýmettik mańyzy bar azyq-túlik taýarynyń 14 túri «Lıder» jáne «Ideal» sýpermarketteriniń 38 núktesinde tutynýshyǵa usynylǵan.
«Óńirde birinshi surypty un, odan daıyndalatyn nan baǵasyn turaqtandyrý úshin un tartý kásipornymen kelisimshart jasaldy. Naýbaıhanalarǵa 4 005 tonna un satyldy. Al, qorda 606,5 tonnany quraıdy. Nannyń baǵasy 1 bólke úshin 80-82 teńgeni quraıdy. Qant tapshylyǵyna jol bermeý máselesi qolǵa alyndy. Osy maqsatta óńirge 400 tonna qant jetkizildi. Bul ónimder «Ideal» jáne «Lıder» sýpermarketteriniń 39 núktesinde naryq baǵasynan 13%-ǵa tómen satylady», -dep málim etti Dmıtrıı Dıý.
Turaqtandyrý qoryndaǵy aýyl sharýashylyǵy taýarlarynyń kólemin 5 myń tonnaǵa deıin ulǵaıtý, aýdandardy qamtý sheńberinde kásipkerlermen qaryz berý sharttaryn jasasý josparlanyp otyr.
Eske sala ketelik, budan buryn Atyraý dalasynda qulpynaı ósirile bastaǵanyn habarlaǵan edik.
