Atyraýda ajyrasqandar sany artty
ATYRAÝ. QazAqparat - Atyraýda neke buzý byltyrǵymen salystyrǵanda 5 %-ǵa kóbeıgen. Kóbinese 27-50 jas aralyǵyndaǵy jubaılardyń ajyrasýy jıi kezdesedi, dep habarlaıdy QazAqparat tilshisi.
Bul týraly óńirlik kommýnıkatsııalar qyzmetinde ótken brıfınıgte Atyraý qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysy Nurly Habıeva aıtty. Spıkerdiń aıtýynsha, eger ótken jyldyń birinshi jartyjyldyǵynda neke buzýshylar sany 496 bolsa, bıylǵy 6 aıda 521-ge deıin ósti.
«Sońǵy eki jyldaǵy kórsetkishterdi salystyrsaq, neke buzý byltyrǵymen salystyrǵanda 5 %-ǵa kóbeıgen. Kóbine 27-50 jas aralyǵyndaǵy jubaılar jıi ajyrasady. Sebebin minezderiniń kelispeýshiliginen jáne ortaq sábıleriniń bolmaýynan dep túsindiredi. Jalpy, qalpyna keltirý úshin shyǵarylǵan akti byltyrǵymen salystyrǵanda eki esege kóbeıip otyr, sebebi bala asyrap alý byltyrǵyǵa qaraǵanda kóp», - deıdi N. Habıeva.
Atyraý qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń málimetinshe, Atyraýda ólim kórsetkishi 2017 jylǵa qaraǵanda 5,9 %-ǵa ósken, onyń ishinde 1 jasqa deıingi balalardyń ólimi kóp jáne júrek, baýyr, búırek aýrýy saldarynan qaıtys bolý faktileri kóbeıip otyr.
