Atyraýda ájesinen adasyp qalǵan 5 jasar bala joǵalyp ketti
ATYRAÝ. QazAqparat – Atyraýda ájesinen adasyp qalǵan 5 jasar bala joǵalyp ketken, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, 12 sáýirde saǵat 19:30 shamasynda balanyń joǵalǵany týraly habar berilgen.
«Egde jastaǵy áıel №15 ýchaskelik polıtsııa beketindegi polıtsııa ınspektorlaryna qońyraý shalyp, óziniń 5 jasar nemeresiniń qas-qaǵym sátte joǵalyp ketkeni jóninde aryzdanǵan. Kámeletke tolmaǵan balanyń ájesi «Munaıshy» shaǵyn aýdanyndaǵy azyq-túlik dúkenine kirgen. Sol kezde nemeresi oınap ketkeni anyqtaldy», -dep habarlady departamenttiń baspasóz qyzmeti.
Joǵalǵan balany izdeý úshin barlyq polıtsııa ýchaskesiniń ınspektorlaryna baǵyt-baǵdar berildi. Ásirese, adamdar kóp jınalatyn oryndar, jaqyn mańdaǵy shaǵyn aýdandar tekserildi. Іzdestirý is-sharasyn júrgizgen polıtseıler joǵalǵan balaqaıdy Geolog eldi mekenindegi Jańaly kóshesiniń boıynan tapty. Bes jasar bala kóshede jalǵyz ózi jylap kele jatqan.
«Baýyr etimizge balaıtyn balany joǵaltýdan asqan ókinish joq. Balamyz joǵalǵanda, dármensiz kúıde qaldyq. Ózimiz izdestirgennen nátıje shyqpady. Dúkende ilingen jadynamada kórsetilgen polıtsııa ınspektorlarynyń telefon nomirine qońyraý shaldym. Poltseıler lezde jaýap berip, jedel izdestirýdi qolǵa aldy. Joǵalǵan balamyzdy taýyp berip, otbasymyzǵa oraltqan №15ýchaskelik polıtsııa ınspektorlary, polıtsııa kapıtany Ǵızatolla Rahmetov pen polıtsııa leıtenanty Ómirzaq Mahanovqa shyn nıetimmen alǵysymdy bildiremin. Qınalǵan kezde polıtsııa qyzmetkerleriniń qorǵanymyz bolatynyna kózim jetti», -deıdi balanyń anasy Gúljıhan Hýresova.
Eske sala ketelik, buǵan deıin atyraýlyq ana ıt talaǵan balasyn aýrýhanaǵa jetkizgen polıtseıge alǵys aıtqanyn jazǵan bolatynbyz.
