Atyraýda ájesinen adasyp qalǵan 5 jasar bala tabyldy

ATYRAÝ. QazAqparat – Atyraýda ájesinen adasyp qalǵan 5 jasar bala joǵalyp ketip, jedel izdestirý sharalarynyń arqasynda tabyldy, dep habarlaıdy QazAqparat.

«Baýyr etimizge balaıtyn balany joǵaltýdan asqan ókinish joq. Balamyz joǵalǵanda, dármensiz kúıde qaldyq. Ózimiz izdestirgennen nátıje shyqpady. Dúkende ilingen jadnamadaǵy polıtsııa ınspektorlaryna qońyraý shaldym. Polıtseıler lezde jaýap berip, jedel izdestirýdi qolǵa aldy. Joǵalǵan balamyzdy taýyp berip, otbasymyzǵa oraltqan №15 ýchaskelik polıtsııa ınspektorlary, polıtsııa kapıtany Ǵızatolla Rahmetov pen polıtsııa leıtenanty Ómirzaq Mahanovqa shyn nıetimmen alǵysymdy bildiremin. Qınalǵan kezde polıtsııa qyzmetkerleriniń qorǵanymyz bolatynyna kózim jetti», - deıdi balanyń anasy Gúljıhan Hýresova.

Oblystyq polıtsııa departamenti baspasóz qyzmetiniń málimetinshe, balanyń joǵalǵany týraly habar 12 sáýirde saǵat 19:30 shamasynda berilgen.

«Egde jastaǵy áıel №15 ýchaskelik polıtsııa ınspektorlaryna qońyraý shalyp, óziniń 5 jasar nemeresiniń qas-qaǵym sátte joǵalyp ketkeni jóninde aryzdanǵan. Ájesi «Munaıshy» shaǵyn aýdanyndaǵy azyq-túlik dúkenine kiripti. Sol kezde nemeresi oınap ketkeni anyqtaldy», - dep habarlady departamenttiń baspasóz qyzmeti.

Joǵalǵan balany izdeý úshin barlyq polıtsııa ýchaskesiniń ınspektorlaryna baǵyt-baǵdar berildi. Ásirese, adamdar kóp jınalatyn oryndar, jaqyn mańdaǵy shaǵyn aýdandar tekserildi. Bala «Geolog» eldi mekenindegi Jańaly kóshesiniń boıynan tabyldy. Ol kóshede jalǵyz ózi jylap kele jatqan.

Eske sala ketelik, buǵan deıin atyraýlyq ana ıt talaǵan balasyn aýrýhanaǵa jetkizgen polıtseıge alǵys aıtqanyn jazǵan bolatynbyz.