Atyraýda «Azamattyq baqylaý» ortalyǵy ashyldy
Bıyl úshinshi márte respýblıka aýmaǵynda júzege asyrylyp otyrǵan áleýmettik joba eń birinshi bolyp Atyraý aımaǵynda óz jumysyn bastady. Osyǵan oraı Qazaqstan Respýblıkasy memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń basshysy Toqtamys Jumaǵulov «Azamattyq baqylaý» qoǵamdyq qabyldaýyna keńes jáne baǵyt-baǵdar suraı kelgen jeke tulǵaly azamattardy qabyldady.
Jobanyń maqsaty Qazaqstan Respýblıkasynyń sybaılas jemqorlyqqa qarsy is-qımyl zańynyń jáne memlekettik qyzmet salasynda, memlekettik qyzmet kórsetý jáne memlekettik qyzmetkerlerdiń Ádep kodeksi talaptarynyń saqtalýyna baılanysty suraqtarǵa konsýltatsııalyq kómek kórsetý, jalpy sybaılas jemqorlyq áreketine ushyraǵan barlyq azamattarǵa tegin zańdy keńes, baǵyt-baǵdar berý. Sybaılas jemqorlyqqa qarsy kúres áreketterin nasıhattaý.
Atalmysh departamenttiń baspasóz hatshysy Aısulý Mıramǵalıqyzynyń aıtýynsha, «Azamattyq baqylaý» qoǵamdyq qabyldaýy kúndelikti saǵat 10:00-den 17:00-ge deıin jumys isteıdi. Ár azamat zańǵa baılanysty barlyq suraqtarǵa tegin keńes ala alady. Sonymen qatar, suraqtar, aryz-shaǵymdar telefon jelisi nemese elektrondyq poshta arqyly qabyldanady. Joba aıasynda aıyna bir ret ár memlekettik qyzmet oryndarynyń birinshi basshylary qabyldaý ótkizedi.
Aıta ketý kerek, «Azamattyq baqylaý» tegin keńes berý qoǵamdyq qabyldaý jobasy Qazaqstan Respýblıkasy memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń memlekettik áleýmettik tapsyrysy sheńberinde «Tórtinshi bılik» qoǵamdyq birlestigimen júzege asyrylýda.