Atyraýda aıyppulyn tólemeı júrgen júrgizýshilerden 16 mln teńge óndirildi
Oblystyq polıtsııa departamenti baspasóz qyzmetiniń aqparatyna súıensek, 7 maýsymnan beri «Boryshker» jedel profılaktıkalyq is-sharasy ótip jatyr.
«Atyraý qalasynyń aýmaǵynda jyl basynan beri aıyppulyn tólemeı júrgen júrgizýshiler anyqtalyp, QR Ákimshilik quqyq buzýshylyq týraly kodeksiniń 785-babyna sáıkes 800-den astam avtokólik arnaıy turaqqa qoıyldy. Avtokólik júrgizýshileriniń tólenbegen 30 mln teńgege jýyq aıyppuly bary anyqtaldy. Al 7 maýsymnan beri ótkizilip jatqan «Boryshker» jedel profılaktıkalyq is-sharasy aıasynda 400-ge jýyq kólik júrgizýshisinen 16 mln teńgeden astam aıyppul óndirilip alyndy. Aıyppuly tólenbegeni úshin 287 avtokólik arnaýly turaqqa jetkizildi», -dep habarlady departamenttiń baspasóz qyzmeti.
Eske sala ketelik, budan buryn Atyraýda aıyppulyn tólemeı júrgen 134 boryshkerden 2 mln teńge óndirilgenin habarlaǵan edik.
Atyraý qalalyq polıtsııa basqarmasynyń ýchaskelik polıtsııa ınspektorlary 30 mamyrdan beri aıyppulyn tóleýden jaltaryp júrgen 134 turǵyndy anyqtady. Olardan jalpy 2 mln 72 myń 189 teńge kóleminde aıyppul óndirildi.
«Qazir aıyppul tóleý ádisi jeńildedi. Aıyppuldy elektrondyq úkimet portalynyń kómegimen onlaın rejıminde, ekinshi deńgeıdegi bankterdiń esep aıyrysý-kassalyq bólimshelerinde, sondaı-aq mobıldi qosymshalar arqyly tóleýge bolady. Osy oraıda Atyraý qalasynyń turǵyndary men qonaqtaryn ákimshilik quqyq buzýshylyq jasamaýǵa, al eger quqyq buzýshylyq tirkelgen bolsa, ákimshilik aıyppuldy ýaqytynda tóleý qajettigin eskertemiz», - dep málim etti departamenttiń baspasóz qyzmetinen.
