Atyraýda aıyppulyn tólemeı júrgen 26 júrgizýshi ustaldy
ATYRAÝ. QazAqparat – Atyraýda ákimshilik aıyppulyn tólemeı júrgen 26 júrgizýshi ustaldy, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, aıyppulyn tólemegen júrgizýshilerdiń deni Reseı Federatsııasynda tirkelgen kólikpen júrgen.
«Kólik júrgizýshileri jyldamdyqty asyrý, jol belgisi talaptaryn oryndamaý, baǵdarshamnyń tıym salynǵan túsinen ótý qaǵıdalaryn buzǵan. Olardyń tarapynan bolǵan jolda júrý erejesin buzý deregi «Sergek» kameralaryndaǵy beınejazbamen dáleldendi. Patrýldik polıtsııa qyzmetkerleri 24 tamyzda «Bereke» shaǵyn aýdanynda 43 jastaǵy júrgizýshi basqarǵan «Reno Duster» kóligin toqtatqan. Tekserý kezinde kóliktiń Reseı Federatsııasynda tirkelgeni, al, júrgizýshiniń 100 myń teńgeden astam 14 ákimshilik aıyppulyn tólemeı júrgeni anyqtaldy. Júrgizýshiden QR Ákimshilik quqyqbuzýshylyq týraly Kodeksiniń 785-babyna sáıkes aıyppuldar tolyq kólemde óndirildi» -dep habarlady departamenttiń baspasóz qyzmeti.
Eske sala ketelik, buǵan deıin Atyraýda 12 mln teńge aıyppuly tólenbegen kólikpen júrgen áıel ustalǵanyn jazǵan edik.
