Atyraýda aıyppulyn tólemeı júrgen 134 boryshkerden 2 mln teńge óndirildi
Oblystyq polıtsııa departamentiniń baspasóz qyzmetinen málim etkendeı, «Boryshker» jedel profılaktıkalyq is-sharasy ótkizilip jatyr.
«Bul is-sharany ótkizýdegi maqsat – jol qozǵalysy erejesin buzǵany úshin ákimshilik aıyppuldardy óz erkimen tólemeı júrgen júrgizýshilerdi anyqtaý. Aıyppuldardy óndirip alýdyń tıimdiligin arttyrý kózdelgen. Máselen, 30 mamyrdan beri Atyraý qalalyq polıtsııa basqarmasynyń ýchaskelik polıtsııa ınspektorlary aıyppuldaryn tóleýden jaltaryp júrgen 134 turǵyndy anyqtady. Olardan jalpy 2 mln 72 myń 189 teńge kóleminde aıyppul óndirildi», -dep habarlady departamenttiń baspasóz qyzmeti.
Aıyppulyn tólemegen júrgizýshilerdiń 24 kóligi arnaıy turaqqa qoıyldy.
«Qazir aıyppuldardy tóleý ádisi jeńildedi. Aıyppuldy elektrondyq úkimet portalynyń kómegimen onlaın rejıminde, ekinshi deńgeıdegi bankterdiń esep aıyrysý-kassalyq bólimshelerinde, sondaı-aq mobıldi qosymshalar arqyly tóleýge bolady. Osy oraıda Atyraý qalasynyń turǵyndary men qonaqtaryn ákimshilik quqyq buzýshylyq jasamaýǵa, al, eger quqyq buzýshylyq tirkelgen bolsa, ákimshilik aıyppuldy ýaqytynda tóleý qajettigin eskertemiz», -dep málim etti departamenttiń baspasóz qyzmetinen.
Eske sala ketelik, budan buryn 25 myńǵa jýyq atyraýlyq 580 mln teńgeden astam salyǵyn tólemeı júrgenin jazǵan edik.
Atyraý oblystyq memlekettik kirister departamentiniń baspasóz qyzmetinen málim etkendeı, turǵyndardyń jyljymaıtyn múlik pen kólik salyǵyna bereshegi 580,2 mln teńgege jetken. Onyń ishinde tólenbegen kólik salyǵy – 549,6 mln teńge.
