Atyraýda aıyppuly tólenbegen sheteldik tirkeýdegi kólikter arnaıy turaqqa jetkizilýde
Oblystyq Polıtsııa departamentiniń baspasóz qyzmetinen málim etkendeı, aıyppulyn tólemeı júrgen júrgizýshi keshe, 15 naýryzda ustalǵan.
«Atyraý qalalyq polıtsııa basqarmasy Jedel basqarý ortalyǵynyń beınebaqylaý qyzmetkerleri jergilikti ýaqytpen 12:55 shamasynda «Interceptor» izdeý júıesi arqyly Grýzııa Respýblıkasynda tirkeýde turǵan «Chevrolet» markaly avtokóliginiń qozǵalys baǵytyn anyqtady. Óıtkeni, bul kóliktiń júrgizýshi birneshe aıyppulyn tólemeı júrgen boryshkerlerdiń tiziminde tur. Sol sebepten, patrýldik polıtsııa kólikti toqtatty. Tekserý kezinde júrgizýshiniń tólenbegen 37 aıyppuly bary belgili boldy, kólemi 900 myń teńgeden asady», - dep habarlady departamenttiń baspasóz qyzmetinen.
Qazir kólik júrgizýshisine qatysty QR Ákimshilik quqyq buzýshylyq týraly kodeksiniń 785-babyna sáıkes hattama toltyryldy. Al avtokólik arnaıy aıyp turaǵyna qoıyldy.
«Polıtsııa qyzmetkerleri ózge adamdardan kólik satyp alý kezinde birneshe máselege nazar aýdarýdy eskertedi. Bul birinshiden, satyp alatyn avtokólikti tekserý qajettiligin, ekinshiden, kólik qujatynyń durystyǵyn qadaǵalaý kerek. Burynǵy ıesiniń tólenbegen aıyppuly bar-joǵyn eskergen jón», - dep málim etti departamenttiń baspasóz qyzmetinen.
Eske sala ketelik, budan buryn Atyraýda jyl basynan 54 jol-kólik oqıǵasy bolyp, saldarynan 24 adam kóz jumǵanyn habarlaǵan edik.
«Jyl basynan beri oblys aýmaǵyndaǵy tasjoldarda 54 jol-kólik oqıǵasy tirkeldi. Jol apatynan 24 adam kóz jumyp, 75 adam ártúrli dene jaraqatyn aldy. Jol-kólik oqıǵalarynyń bári júrgizýshilerdiń jolaýshylardyń qaýipsizdigine salǵyrt qaraýynan bolǵan», - deıdi jergilikti polıtsııa qyzmeti basqarmasynyń basshysy Erlan Bıǵambaev.