Atyraýda áıeldi qaqqan júrgizýshi 2,5 jylǵa bas bostandyǵynan aıyryldy
ATYRAÝ. QazAqparat - Atyraýda áıel adamdy qaǵyp ketken júrgizýshige 2,5 jyl merzimge kolonııaǵa jiberý jazasy taǵaıyndaldy, dep habarlaıdy QazAqparat tilshisi.
«2019 jyldyń 9 qazany kúni sottalýshy «Toyota Ipsum» markaly avtomobıline júrgizýshi kýáliginsiz mingen. Ol Azattyq dańǵylymen Balyqshy shaǵynaýdanyna bara jatqan jolda áıeldi qaǵyp ketken. Jábirlenýshi Atyraý oblystyq aýrýhanasynyń jansaqtaý bólimine jetkizilip, sonda es jımaı kóz jumdy. Tergeý kezinde sottalýshy aıybyn tolyq moıyndady. Sotta jábirlenýshiniń ákesi, sottalýshy keltirilgen materıaldyq jáne moraldyq zalaldyń qunyn ótep bergenin aıtyp, sondyqtan ony qylmystyq jazadan bosatýdy surady», - delingen habarlamada.
Sotta is kelisim óndirisinde qaraldy. Sottalýshy aıypty dep tanyldy. Oǵan 3 jyl merzimge kólik quralyn júrgizý quqyǵynan aıyra otyryp, 2 jyl 6 aı merzimge bas bostandyǵynan aıyrý jazasy taǵaıyndaldy.
