Atyraýda áıelderge bıznes bastaýǵa kómektesetin ortalyq ashyldy
Jańa ortalyq «Atameken» UKP Atyraý óńirlik fılıalynyń bazasynda jumys isteıdi.
Ortalyqtyń qoldaýymen kásip ashýǵa bet burǵan áıelder kásipkerlikke oqytý kýrsynan ótip, qarjylandyrý, bıznesti damytý jóninde keńes beriledi.
«Atyraý oblysynda shaǵyn jáne orta kásipkerlik sýbektileri ıeleriniń arasynda áıelderdiń úlesi 52 paıyzdy quraıdy. Bul kórsetkish 10 jyl buryn jyl buryn áldeqaıda az edi. Áıelderdiń kásipkerlikke bet burýy – memleket tarapynan kórsetilgen qoldaý jemisi. Endi kásipkerlikti bastaǵysy keletin áıelderge bıznesti qurý jáne damytý úshin qajetti qoldaý kórsetetin ortalyq bar. Bul bastama kásipkerlikpen aınalysatyn áıelder sanynyń artýyna eleýli úles qosady dep esepteımin», -deıdi oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń bas ınspektory-hatshysy Zámzágúl Jalmýrzına.
Áıelder kásipkerligin damytý ortalyǵy jetekshisiniń keńesshisi Gúlnafıs Jarmuhambetovanyń aıtýynsha, kásipker áıelder startaptardy iske qosý, jumys istep turǵan bıznesti odan ári keńeıtý úshin birqatar qyzmetti alady.
Sondaı-aq, oqytý baǵdarlamalaryna, netvorkıng-is-sharalarǵa qatysady.
«Ortalyq áıelder kásipkerligin damytýǵa, oqytý, kooperatsııa jáne qajetti quzyretterdi qalyptastyryp, olardyń ekonomıkalyq belsendiligin arttyrýǵa, bıznesti qoldaý baǵdarlamalary sheńberinde jeńildetilgen kredıtter men granttar berýge, jumyspen qamtýǵa, óndirgen taýarlary men qyzmetterin ótkizý naryǵyn keńeıtýge yqpal etedi. Osy oraıda basty nazardy aýyldarda turatyn áıelderge aýdarýdy josparlap otyrmyz», -deıdi Gúlnafıs Jarmuhambetova.
Eske sala ketelik, buǵan deıin Atyraý oblysynda 26 myńnan astam kásipkerlik nysanyn áıelder basqaratynyn jazǵan bolatynbyz.
