Atyraýda áıel emshige barǵannan keıin ajal qushty
ATYRAÝ. QazAqparat - Atyraýda múgedek áıel emshiniń emdeýinen keıin qaıtys bolǵan. Bul oqıǵa boıynsha emshi sotqa tartyldy, dep habarlaıdy «QazAqparat» HAA tilshisi.
«Atyraý oblysynyń Mahambet aýdandyq soty QR QK 104-babynyń 1-bóligi boıynsha O.N-ǵa qatysty qylmystyq isti qarady. Sotta jábirlenýshiniń uly telefon boıynsha emshige polıartrıt derdimen baılanysty 13 jyl tósek tartyp jatqan 2-toptaǵy múgedek anasyn emdeýge aparýǵa kelisken. Emdeý kezinde emshi jábirlenýshiniń aýyratyn aıaǵyn kúshpen tartyp, qolymen tizesinen basady. Osy jaıttan keıin naýqas esinen tanyp, jedel járdem kómegimen aýrýhanaǵa jetkiziledi. Ol aýdan aýrýhanasynda travmatıkalyq shoktan qaıtys boldy», - delingen Mahambet aýdandyq soty taratqan baspasóz baıanynda
Sot úkimimen azamat O.N. QK 104-baby 1-bóligi boıynsha aıypty dep tanylyp, bir jylǵa bas bostandyǵynan aıyryldy.
