Atyraýda áıel eki qyzyn jaldamaly páterde qaldyryp, ózi ketip qalǵan.
ATYRAÝ. QazAqparat – Atyraý qalasynda 35 jastaǵy áıel eki qyzyn jaldamaly páterge tastap ketken, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna qaraǵanda, esh jerde jumys istemeıtin áıel 2019 jyldan beri qaladaǵy Telman kóshesinde páter jaldap turǵan. Jaqynda sol áıel 5 jáne 3 jasar qyzyn jaldamaly páterde qaldyryp, ózi ketip qalǵan.
«Bul týraly polıtsııaǵa áıeldiń Aqtaý qalasynda turatyn 18 jastaǵy úlken qyzy habarlady. Anasy oǵan qońyraý shalyp, jaldamaly páterdegi eki sińlisine qaraýdy tapsyrǵan. Arada birneshe kún ótkenmen, balalardyń anasynan habar bolmady. Al ony tanıtyndar sońǵy ret 5 qarashada Dútbaeva kóshesindegi jaldamaly páterlerdiń birinen kórgen», - dedi Atyraý qalalyq polıtsııa basqarmasy bastyǵynyń birinshi orynbasary Erlan Bıǵambaev.
Polıtseıler tekserý kezinde budan buryn bul áıeldiń «Kámeletke tolmaǵan balany tárbıeleý jónindegi mindetterdi oryndamaý» babymen ákimshilik jaýapkershilikke tartylǵanyn anyqtaǵan. Onyń balalary beıimdeý ortalyǵyna ornalastyrylǵany belgili bolǵan.
«Qazir eki qyz bala qaıtadan beıimdeý ortalyǵyna ornalastyryldy. Al, balalaryn tastap ketken áıelge qatysty jınaqtalǵan qujattar ata-ana quqyqtaryn shekteý týraly máseleni qaraý úshin kámeletke tolmaǵandardyń quqyqtaryn qorǵaý jónindegi komıssııaǵa jiberildi», -dedi Erlan Bıǵambaev.
Eske sala ketelik, budan buryn Atyraýda túngi tynyshtyqty buzǵan 1,5 myń adam jaýapkershilikke tartylǵan bolatyn.
