Atyraýda aıazǵa tózimdi dızel otyny óndirile bastady
ATYRAÝ. QazAqparat - Atyraý munaı óńdeý zaýyty eń tómengi súzgiden ótý temperatýrasy mınýs 38S bolatyn aıazǵa tózimdi dızel otynyn óndirý jáne jóneltý qondyrǵysyn iske qosty, dep habarlaıdy QazAqparat tilshisi.
«Qazaqstannyń kóptegen aımaqtarynda kúnniń sýytýyna baılanysty atalmysh otyn otandyq tutynýshylar arasynda keńinen suranysqa ıe bolady. Birinshi partııa Atyraý munaı óńdeý zaýytynda 14 qarashada jóneltildi, búgingi kúni 3 088 tonna tıeldi. Atyraý MÓZ qarasha aıynda 3 500 tonna munaı jóneltýdi josparlap otyr», - dep habarlady «QazMunaıGaz »UK« AQ Basqarma tóraǵasynyń munaı óńdeý jáne marketıng jónindegi orynbasary Danııar Tıesov. Khazar -38 dızel otyny-zaýyt pen búkil Qazaqstan úshin biregeı ónim. Ol K5 ekologııalyq klasqa sáıkes keledi, ıaǵnı quramynda kúkirt pen parafınderi joqtyń qasy jáne quramynda tómen temperatýra qasıetterine áser etetin qospalar joq, sondyqtan bul tehnologııalyq protsestiń taza ónimi. Qazaqstanda munaıdy tereń óńdeý kesheniniń Prime D dızel otynyn gıdrotazalaý jáne deparafınızatsııalaý qondyrǵysynda ǵana osyndaı qatpaıtyn janarmaı óndiriledi.
