Atyraýda avtobýs júrgizýshileri jetispeıdi
ATYRAÝ. QazAqparat – Atyraý qalasynda avtobýs júrgizýshileri jetispeıdi, dep habarlaıdy QazAqparat.
Atyraý qalasynyń ákimi Qaırat Orazbaevtyń aıtýynsha, jolaýshy tasymaldaýshy kásiporyndardyń avtoparkinde 289 avtobýs bar.
«Kún saıyn jolaýshy tasymaldaýǵa 210-220 avtobýs ǵana jolǵa shyǵady. Sebebi, avtobýs júrgizýshileri jetispeıdi. Bul 60 avtobýstyń rezervte turýyna áser etip otyr»,-deıdi Qaırat Orazbaev.
Onyń málimetinshe, bıylǵa deıin Atyraý qalasynda 71 ashyq, 24 jabyq aıaldama jańasyna aýystyrylǵan.
Sondaı-aq, 47 aıaldama senimgerlik basqarýǵa berilgen.
«Bıylǵy jyldyń sońyna deıin Qazaqstanda shyǵarylǵan 120 aıaldamany satyp alý josparlanyp otyr. Osylaısha, eski aıaldamalar jańasyna aýystyrylady. Keıbir kóshelerge jańa aıaldamalar ornatylady», - deıdi Qaırat Orazbaev.
Eske sala ketelik, Atyraýda metanmen júretin avtobýstar jolǵa shyqqan edi.
