Atyraýda avtobýs júrgizýshileri tegin júrýge tıis oqýshylardan aqsha talap etken
Atyraý qalasynyń prokýrory Arshat Taıtýllınniń aıtýynsha, balalardy jalpy bilim beretin mektepterge tasymaldaý kezinde qaýipsizdikti qamtamasyz etýdiń saqtalýyna taldaý júrgizilgen.
«Prezıdent Qasym-Jomart Toqaev bıylǵy balalar jylyna olardyń quqyqtaryna basa kóńil bólýdi tapsyrǵan edi. Osyǵan baılanysty balalar quqyǵynyń saqtalýyna taldaý júrgizý kezinde birneshe zań buzýshylyq anyqtaldy. Máselen, mektep avtobýsyn júrgizýshilerde kólik quraldaryn basqarý quqyǵynyń tıisti sanaty bolmaǵan. Kólik quraldaryna mindetti tehnıkalyq tekserý júrgizilmegen. Bul balalardyń ómiri men densaýlyǵyna qaýip tóndiredi», -deıdi Arshat Taıtýllın.
Onyń málimetinshe, taldaý nátıjesimen zań buzýshylyqty joıý týraly usyný engizilgen. Prokýrordyń aktisine sáıkes, Atyraý qalasyndaǵy mektepterdiń 5 laýazymdy tulǵasy tártiptik jaýapkershilikke tartylyp, 2 avtobýs júrgizýshisi jumystan shettetilgen.
«Qazir anyqtalǵan zańbuzýshylyqtar joıyldy. Mektep avtobýstarynyń júrgizýshilerine jáne kólik quraldaryna qoıylatyn talaptar zań talabyna sáıkestendirildi. Osy kezge deıin Atyraý qalalyq máslıhatynyń 2015 jylǵy 27 naýryzdaǵy №268 sheshiminiń talaptaryna qaramastan, balalardan ekinshi sapardan keıin jolaqyny tóleý talap etilip kelgen. Prokýrordyń aktisimen balalardyń qoǵamdyq kólikte tegin jol júrý quqyǵy qamtamasyz etilip, kináli tulǵalar tártiptik jaýapkershilikke tartyldy», -deıdi qala prokýrory Arshat Taıtýllın.
Eske sala ketelik, buǵan deıin Atyraýda oqýshynyń soqqyǵa jyǵylǵanyn habarlamaǵan mektep dırektory jazalanǵanyn habarlaǵan bolatynbyz.
