Atyraýda avtobýs júrgizýshileri múgedekterge arnalǵan pandýstyń bar ekenin de bilmeıdi

ATYRAÝ. QazAqparat – Atyraý qalasyndaǵy qoǵamdyq kólik júrgizýshileri avtobýstarda múmkindigi shekteýli jandardyń minip-túsýine arnalǵan pandýstyń baryn, tipti ony paıdalaný ádisin de bilmeıdi, dep habarlaıdy QazAqparat.

Bul týraly qoǵamdyq kólik qyzmetine monıtorıng júrgizgen «Atyraý – adaldyq alańy» jobalyq keńsesiniń jetekshisi Alfııa Ádıeva málim etti.

«Bizdiń keńsege múmkindigi shekteýli jandar jıi shaǵym aıtyp keledi. Olardyń aıtýynsha, qalaishilik marshrýtta qatynaıtyn avtobýstar pandýspen jabdyqtalǵan. Alaıda, ony paıdalaný múmkin emes. Osyǵan oraı jobalyq keńse mamandary bir apta boıy qoǵamdyq kólik qyzmetine monıtorıng júrgizdi. Atyraý qalasynda №7, 10, 14, 20, 53, 58 marshrýttardaǵy 50-ge jýyq avtobýsta pandýs bar. Qulsary qalasynda dál osyndaı jabdyǵy bar 10 avtobýs qatynaıdy. Biraq, pandýs paıdalanylmaǵan. Avtobýs júrgizýshileri qolarbada otyrǵan múgedekti mingizbeý úshin aıaldamadan asyp toqtaǵan faktiler kezdesti. Reıd kezinde júrgizýshilerdiń avtobýsta pandýs baryn bilmegeni de anyqtaldy. 3 júrgizýshi pandýsty paıdalaný ádisin bilmeıdi» -deıdi «Atyraý – adaldyq alańy» jobalyq keńsesiniń jetekshisi Alfııa Ádıeva.

Qoǵamdyq kóliktegi mundaı kemshilikti joıý úshin monıtorıng qorytyndysy qalalyq ákimdik pen tasymaldaýshy kompanııaǵa jiberildi.