Atyraýda avtobýs júrgizýshileri bir kúnde 55 márte ereje buzǵan
ATYRAÝ. QazAqparat – Atyraýda avtobýs júrgizýshileri bir kúnde 55 márte ereje buzǵan. Al, ekeýi rýlge araq ishken kúıde otyrǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, keshe, 4 qazanda «Avtobýs» jedel aldyn alý is-sharasy bastalǵan. Maqsat – jolaýshylar kóligi júrgizýshileri tarapynan jol qozǵalysy erejelerin buzýdyń aldyn alý.
«Polıtsııa qyzmetkerleri is-sharanyń alǵashqy kúninde avtobýs júrgizýshileriniń jolda júrý erejesin 55 márte buzǵanyn anyqtady. Onyń ishinde jolaýshylardy, bagajdy jáne júkterdi tasymaldaý qaǵıdalaryn buzýdyń – 4, tıisti ruqsatsyz qaıta jabdyqtaý – 3, tehnıkalyq baıqaýdan ótpegen – 17, rýlde telefondy nemese radıostantsııany paıdalaný – 15, jyldamdyqty arttyrý – 7, manevr jasaý erejelerin buzý – 11, QR mindetti saqtandyrý týraly zańnamasyn buzýdyń 5 deregi bar. Jolaýshy tasymaldaıtyn 4 avtobýs aıyp turaǵyna qoıyldy. Kináli júrgizýshilerge aıyppul salyndy» -dep habarlady departamenttiń baspasóz qyzmeti.
Sondaı-aq, avtobýs rýline ishimdik ishken kúıde otyrǵan eki júrgizýshi ustalǵan.
«Máselen, 4 qazanda tańǵy saǵat 07:40 shamasynda «Aqtobe-Atyraý-RF shekarasy» baǵytyndaǵy tas jolda qoǵamdyq kólik toqtatyldy. Tekserý kezinde 1979 jylǵy júrgizýshiniń ishimdik ishkeni belgili boldy. Al, saǵat 08:52-de dál osy baǵyttaǵy joldyń 577-shaqyrymynda avtobýs kóligin alkogoldik ishimdik ishken kúıinde basqarǵan taǵy bir júrgizýshi ustaldy. Eki júrgizýshige qatysty QR Ákimshilik quqyqbuzýshylyq týraly Kodeksiniń 608-babymen ákimshilik hattamalar toltyryldy» -dep málim etti baspasóz qyzmetinen.
Eske sala ketelik, budan buryn Atyraýda avtobýs júrgizýshileri bir kúnde 170 ret ereje buzǵanyn habarlaǵan edik.
