Atyraýda avtobýs júrgizýshileri bir kúnde 170 ret ereje buzǵan
ATYRAÝ. QazAqparat – Atyraýda avtobýs júrgizýshileri bir kúnde erejeni 170 ret buzǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, óńir aýmaǵynda 20 qańtardan beri «Avtobýs» jedel-profılaktıkalyq is-sharasy ótip jatyr.
«Іs-sharanyń alǵashqy kúninde oblysta avtobýstarǵa qatysty 170 zań buzýshylyq anyqtaldy. Onyń ishinde 42 avtobýs júrgizýshi manevr jasaý qaǵıdalaryn buzǵan. Sondaı-aq, 38 júrgizýshiniń rýlde telefonmen sóıleskeni belgili boldy. Kólik jyldamdyǵyn asyrǵan 8 júrgizýshi jaýapqa tartyldy. Al, 19 avtobýs mindetti tehnıkalyq tekserýden ótpegen bolyp shyqty», - dep habarlady departamenttiń baspasóz qyzmetinen.
Eske sala ketelik, budan buryn Atyraýda mas bolyp kólik júrgizgen 558 júrgizýshi jazalanǵan bolatyn.
