Atyraýda aýyl sharýashylyǵy jármeńkesinde 13 tonnadan astam ónim satyldy
ATYRAÝ. QazAqparat – Atyraý qalasynda 7-8 qarashada ótken aýyl sharýashylyǵy taýarlarynyń jármeńkesi ótip, 13 tonnadan astam ónim satyldy, dep habarlaıdy QazAqparat.
Atyraý qalalyq kásipkerlik jáne aýyl sharýashylyǵy bólimi mamandarynyń málimetinshe, senbi, jeksenbi kúnderi «Munaıshy» stadıonynyń aldyndaǵy alań men «Saraıshyq» kommýnaldyq bazarynda, «Bereke» yqshamaýdanynda aýyl sharýashylyǵy ónimderiniń jármeńkesi uıymdastyryldy. Jármeńkege 62 sharýa qojalyǵy men taýar óndirýshileri qatysty.
«Qala turǵyndary men qonaqtaryna naryqtyq qunynan tómen baǵamen et, sút, kókónis ónimderi usynyldy. Jármeńkede 13 tonnadan astam aýyl sharýashylyǵy ónimderi satyldy. Onyń ishinde 4,1 tonna kartop, 2,2 tonna sábiz, 3,1 tonna pııaz, 1,1 tonna qyryqqabat, 1,9 tonna et, 500 keli qyzanaq, 570 keli qııar men 400 lıtr sút ónimderi bar» -dep habarlady Atyraý qalalyq ákimdiginiń baspasóz qyzmeti.
Eske sala ketelik, budan buryn da Atyraýda eki kúngi jármeńkede 13 tonna ónim satylǵan bolatyn.
