Atyraýda aýyl muǵalimderine saýyqtyrý úshin beriletin 10,8 mln teńge keshigip tólengen
Ótken jyldyń 13 maýsymynda oblystyq salalyq kásipodaqqa Damby óner mektebiniń 43 pedagogy aryzdanǵan.
Muǵalimder birneshe jyldan beri saýyqtyrý járdemaqysynyń naqty oqý júktemesine sáıkes tólenbeı, oqý jylynyń aldynda ǵana bekitilgen tarıfpen berilgenine shaǵymdanǵan.
«Atyraý oblysy bilim jáne ǵylym qyzmetkerleriniń kásiptik odaǵy» qoǵamdyq birlestigi atalǵan shaǵymǵa baılanysty oblystyq memlekettik eńbek ınspektsııasynyń kómegine júgingen.
Ustazdar aryzyna oraı basqarma tarapynan arnaıy tekserýler júrgizilip, barlyq talap-tilekter zerdelengen.
Bul másele byltyrǵy 30 qarashada Atyraý oblysynyń ákimi Serik Shápkenovtiń tóraǵalyǵymen ótken áleýmettik áriptestik pen áleýmettik jáne eńbek qatynastaryn retteý jónindegi oblystyq komıssııa otyrysynda talqylanǵan.
«Atyraý oblystyq bilim basqarmasyna Damby óner mektebiniń jáne basqa da oqý oryndarynda jumyskerlerge beriletin naqty jumys jasaǵan júktemeleri tarıfıkatsııaǵa sáıkes saýyqtyrýǵa arnalǵan tıisti tólemderdi qaıta esepteý, qajetti qosymsha qarjy bólinip, berilýin qamtamasyz etý týraly sheshim qabyldandy. Jýyrda Damby óner mektebi dırektorynyń mindetin atqarýshy Ǵalymjan Sultanov qyzmetkerlerdiń 2021–2022 oqý jylyndaǵy saýyqtyrý qarjysy tolyqtaı tólengenin jetkizdi. Osy mekteptiń 88 muǵalimine bıýdjetten 10 mln 885 myń 257 teńge tólenip otyr. Osylaısha oblystyq salalyq kásipodaqtyń kómegine júgingen pedagogtardyń talaptary oryndaldy», -dep habarlady salalyq kásipodaqtyń baspasóz qyzmeti.
Eske sala ketelik, buǵan deıin Atyraýda jumysshy quqyǵyn buzǵan 21 kásiporyn 4 mln teńge aıyppul tólegenin habarlaǵan edik.
