Atyraýda aýyl kóshelerine jaryqdıodty shamdar ornatylýda
ATYRAÝ. QazAqparat - Atyraýda qala mańyndaǵy úılerdiń aýlalaryn jaryqtandyrý máselesi sheshilýde. Osyǵan deıin Geolog aýylynyń turǵyndary kóshelerde jaryq shamdarynyń joqtyǵyna shaǵymdanǵan bolatyn, dep habarlaıdy QazAqparat.
Atyraý ákimdiginiń baspasóz qyzmetinen habarlaǵandaı, osy kúnderi Geolog aýyldyq okrýginde kóshelerdi jaryqtandyrý problemasy belsendi túrde sheshilýde. Jaqynda munda 62 úıdiń aýlalaryna jaryqdıodty shamdardy ornatý jobasy aıaqtaldy.
«Biz eki apta boıy únemdelgen bıýdjet qarajaty esebinen aýlalardy jaryqtandyrý jumysyn júrgizdik. Úılerge shamdardy ornatýdy «Bekjan» JK júzege asyrdy», - deıdi Geolog aýyldyq okrýginiń ákimi Qýandyq Jaqııalıev.
Joba sheńberinde 50 vatt jáne 75 vatt energııany únemdeıtin 35 elektrod satyp alyndy. Olar úıler men áleýmettik mekemelerdiń aldyna ornatyldy.
2018 jyly Geolog aýyldyq okrýginde memlekettik-jekeshelik áriptestik sheńberinde bes kósheni qamtıtyn 3,3 km kóshe jaryqtandyryldy. Jańa jylda MJÁ sheńberinde taǵy 6 kósheni jaryqtandyrýdy josparlap otyrmyz», - dep túsindirdi Qýandyq Jaqııalıev.
Aıta keteıik, «Atyraýdaǵy kóshelerdi jaryqtandyrý jelilerin salý jáne paıdalaný» 2017 jyldan bastap memlekettik-jekeshelik áriptestik aıasynda júzege asyrylady. 2019 jyly qosymsha eki MJÁ jobasy aıasynda qalanyń 192 kóshesine jaryq ornatý josparlanýda.
