Atyraýda aýrýhanalarda koronavırýs juqtyrǵandarǵa arnalǵan chek-paraqtar engizildi
ATYRAÝ. QazAqparat–Atyraý oblysynyń aýrýhanalarynda koronavırýs juqtyrǵandarǵa arnalǵan chek-paraqtar engizildi, dep habarlaıdy QazAqparat.
№2 oblystyq ınfektsııalyq aýrýhanasy COVID-19 bólimshesiniń meńgerýshisi Nurfııa Qızatovanyń málimetinshe, koronavırýs ınfektsııasyn juqtyrýǵa kúdikti, ne COVID-19 belgisi anyqtalǵan naýqastardyń jaǵdaıyn baǵalap, olardy qashyqtyqtan baqylaý úshin arnaıy chek-paraqtar engizilip otyr.
«Mobıldi brıgada mamandary chek-paraqtar arqyly qaýipti indet aǵynynyń aýyrlyǵyna baılanysty naýqasty aýrýhanaǵa jatqyzý týraly sheshim qabyldaı alady. Mundaı sheshim dene qyzýynyń kóterilýi, entigý sekildi belgiler bolǵanda ǵana emes, naýqastaǵy ilespe aýrýlardyń jáne adam ómirine qaýip tóndiretin faktorlardyń birqatar parametri negizinde qabyldanady», - dedi Nurfııa Qızatova.
№2 oblystyq aýrýhananyń dırektory Maǵjan Sıdjanov turǵyndardy qaýipti indettiń aldyn alý sharalarynan habardar bolyp, adam kóp jınalatyn jerlerge barmaýǵa shaqyrdy.
«Búgin kezekshi synyptarda sabaq bastaldy. Ata-analardan balalaryn qorǵaýdy suraımyz. Balalardyń jaı-kúıi týraly únemi habardar bolý kerek. Dene qyzýy kóterilgen bolsa, mektepke jibermegen jón. Pandemııa kezeńinde basqa da ınfektsııalyq aýrýlardyń aldyn alý maqsatynda josparly ekpelerdi alý úshin emhanaǵa ýaqytyly barý kerek ekenin eskertemin», - dedi Maǵjan Sıdjanov.
Eske sala ketelik, buǵan deıin Atyraýda eki salynǵan modýldi ınfektsııalyq aýrýhana ashylǵan bolatyn.
