Atyraýda aýrýhanadaǵy júkti áıeldiń ólimine qatysty qylmystyq is qozǵaldy
Atyraý oblystyq polıtsııa departamenti baspasóz qyzmetiniń málimetinshe, qylmystyq is QR Qylmystyq kodeksiniń 317-babymen bastalǵan.
«Aýrýhanada 1990 jylǵy júkti áıeldiń qaıtys bolý deregine qatysty QR Qylmystyq kodeksiniń 317-babymen (Medıtsına nemese farmatsevtıka jumyskeriniń kásiptik mindetterin tıisinshe oryndamaýy) sotqa deıingi tergeý bastaldy. Tıisti saraptamalar taǵaıyndaldy», - dep málim etti departamenttiń baspasóz qyzmetinen.
Ózge aqparat QR qylmystyq-protsestik kodeksiniń 201-babyna sáıkes jarııalaýǵa jatpaıdy.
Budan buryn Atyraý aýrýhanasynda túsik tastaǵan áıel qaıtys bolǵanyn jazǵan edik.
Jergilikti qoǵam belsendisi Nurlan Jýnasovtyń áleýmettik jelide qaldyrǵan jazbasyna qaraǵanda, 32 jastaǵy júkti áıeldi aýrýhanadan shyǵaryp jibergen. Úıine oralǵan áıeldiń jaǵdaıy nasharlap, aýrýhanaǵa qaıta jetkizilgen. Júkti áıel aýrýhanada túsik tastap, keıin kóz jumǵan. Biraq, 17 aptalyq shaqalaqtyń denesi máıithanada 10 kún saqtalǵan. Bul týraly áıeldiń kúıeýine de, týystaryna da eshkim habar bermegen.
Qaıtys bolǵan áıel kúıeýge úsh jyl buryn shyqqan. Onyń otbasynda kámeletke tolmaǵan eki bala qaldy.
