Atyraýda aýlada júrgen balalarǵa jaǵdaıdyń qaýipti ekenin koronavırýs qýyrshaqtar eskertti

ATYRAÝ. QazAqparat – Atyraýda koronavırýs qaýpin eskertetin ózgeshe tásil usynyldy, dep habarlaıdy QazAqparat.

Óńirlik kommýnıkatsııalar qyzmetiniń habarlaýynsha, karantınge qaramastan, aýlada, alańdarda balalar oınap júr. Sondyqtan, ata-analarǵa oı salý úshin koronavırýs keıpindegi qýyrshaqtardy qoldanýdy jón kórgen.

«Balalardyń densaýlyǵyn saqtaý úshin osyndaı tásil arqyly ata-analardy oılandyrýdy jón kórdik. Qaýipti ınfektsııa balalaryńyzben birge aýlada «oınap júrýi» múmkin. Balalar daladan juqtyryp, úıge alyp kelýi yqtımal. Balalardyń shoǵyrlanǵan jerine koronavırýs keıipindegi qýyrshaqtar barady» - deıdi Atyraý oblystyq Mahambet atyndaǵy akademııalyq qazaq drama teatrynyń dırektory Berik Jámenov.

Osy sátti keıbiri tosyrqap qashqaqtasa, keıbiri eligip oınaǵysy keledi. Sol sátte daýys zoraıtqysh iske qosylady.

«Qurmetti ata-analar, balalaryńyzdyń taǵdyrymen oınamańyzdar. Olardy qaýip-qaterge ıtermelemeńizder. Odan da balalarǵa qorǵan bolyńyzdar. Koronavırýs indeti álemde talaı balanyń ajalyna aınaldy. Kózge kórinbeıtin qater janyńyzda júrýi ábden múmkin. Balańyz koronavırýstyń kelesi qurbanyna aınalmasyna kim kepil?! Karantın – dalada oınaıtyn ýaqyt emes, úıde qaýipsizdikti oılaıtyn ýaqyt. Balalaryńyzdyń, otbasyńyzdyń amandyǵy úshin úıde otyryńyz, úıde oınańyz. Karantın bitkenshe shydańyz. Bul –sizderdiń qaýipsizdikterińiz úshin jasalǵan sheshim. Tártipke baǵynyp, sabyrly bolyńyzdar»! degen sózder aıtylady» - deıdi Berik Jámenov.

Uıymdastyrýshylar osyndaı tásil arqyly ata-analardy oılandyratynyna senedi.