Atyraýda áýesqoı boksshylar úshin motıvatsııalyq týrnır ótti

ATYRAÝ. QazAqparat – Atyraýda áýesqoı boksshylarǵa arnalǵan «Bolattaı batyr bol!» motıvatsııalyq týrnıri ótti, dep habarlaıdy QazAqparat tilshisi.

Oblys ortalyǵyndaǵy «Atyraý» sport kesheninde bokstan halyqaralyq dárejedegi sport sheberi, KSRO-nyń 5 dúrkin chempıony, Eýropa chempıony, Barselona olımpıadasynyń qatysýshysy, Atyraý oblysynyń qurmetti azamaty Bolat Temirovtiń júldesine arnalǵan «Bolattaı batyr bol!» atty motıvatsııalyq týrnır ótti.

«Mundaı sporttyq is-sharalar jastardyń sportqa qyzyǵýshylyǵyn, salaýatty ómir saltyn ustaný kózqarasyn qalyptastyrady. Atyraý oblysy sportynyń damýyna serpin berip, jańa chempıondardyń shyǵýyna sebepshi bolary haq. Qazir óńirde buqaralyq sportpen 277 248 adam aınalysady. Bul – oblys turǵyndarynyń 40 paıyzy», - dedi oblys ákiminiń orynbasary Qaırat Nurtaev.

Alǵashqy motıvatsııalyq týrnırge Bolat Temirovpen birge UFC-den jeńil salmaqtaǵy álem chempıony Habıb Nýrmagomedov, jaýyngerlik sambodan álem chempıony Islam Mahachev, bokstan Olımpıada chempıony Serik Sápıev, karate shıdokannan álem chempıony Aıdar Mahmetov, NFC prezıdenti Nurbek Qarabala arnaıy shaqyryldy.

Týrnırde Astana, Aqtaý, Atyraý qalalarynan 20 áýesqoı boksshy baq synady. Ár salmaqta ótken tartysty doda nátıjesinde Meıirlan Áset, Jasulan Qazalıev, Djahar Shafhatov, Aıbek Idrısov, Abylaı Bitimov, Jandos Qaıratov, Bekzat Bitimov jáne Asylhan Uzaqbaev jeńiske jetti.

Eske sala ketelik, buǵan deıin UFC chempıony Habıb Nýrmagomedov atyraýlyq jankúıerlerimen kezdeskenin jazǵan edik.