Atyraýda aýdandyq qorǵanys isteri bólimderi ǵımaratynyń tıptik jobasy jasaldy
ATYRAÝ. QazAqparat - Atyraý oblysynyń ákimi Nurlan Noǵaev jumys saparymen Maqat aýdanyna baryp, óńirdiń áleýmettik-ekonomıkalyq damýymen tanysty, dep habarlaıdy QazAqparat.
Nysandardy aralamastan buryn oblys ákimi «Nur Otan» partııasynyń aýdandyq fılıalynda azamattardy jeke máseleleri boıynsha qabyldady.
Maqat aýdanynyń ákimi Jumabaı Qaraǵaev balabaqsha kezeginde 800 bala turǵanyn atap ótti. Aýdanda úsh balabaqshanyń qurylysyna jobalaý-smetalyq qujattama ázirlenip jatyr. Bul nysandar mektepke deıingi uıymdaryna kezek máselesin sheshýge múmkindik beredi. Sonymen qatar, Dossor poselkesinde turǵyn úı qurylysy júrip jatyr, osyndaı úıdi Maqatta salý da josparda bar. Múmkindigi shekteýli balalardyń problemasyn sheshý úshin oblystyq, aýdandyq bıýdjetterden qajet qarajat bólý boljanyp otyr.
Sapar barysynda aımaq basshysy balalar óner mektebine bardy. Oqý ornynda 350 bala bilim alýda. Ónerge baýlıtyn mektep talantty balalar tárbıelep jatyr. Búginge deıin mekteptiń 200-den astam oqýshysy ár túrli deńgeıdegi baıqaýlarda júldeger atanǵan.
Oblys ákimi Maqat poselkesindegi tazartý qondyrǵysynyń qurylysymen de tanysty. Óńir úshin mańyzdy bul nysan qurylysy 2018 jyly bastalǵan. Jyl aıaǵyna deıin paıdalanýǵa beriledi. Jobanyń jalpy quny 3,7 mlrd teńge. Tazartý qondyrǵysyna aýdan tolyǵymen qosylatyn bolady. Osy arqyly ekologııalyq máselelerdi sheshýge múmkindik týady. Búginge deıin barlyq káriz qaldyqtary tazarmaǵan kúıinde býlany alańyna quıylyp keledi.
Nurlan Noǵaev aýdandyq qorǵanys isteri bólimi men sanatorlyq tıptegi «Shapaǵat» balalar baqshasyna da bardy. Aýdandyq qorǵanys isterý bóliminde oblys ákimi jaqyn arada jańa ǵımarat qurylysy bastalatynyn atap ótti.
«Qazir aýdandyq qorǵanys isteri bólimderine jańa ǵımarat salýdyń tıptik jobasyn jasap jatyrmyz. Birinshi nysan Mahambet aýdanynda salynady, keıin basqa aýdandarda da jalǵasady», - dedi Nurlan Noǵaev.
120 oryndyq balabaqsha qurylysyn da aımaq basshysy arnaıy baryp kórdi. Memlekettik-jekeshelik áriptestik aıasynda salynyp jatqan balabaqsha qurylysy josparǵa saı júrýde. Aıta ketý kerek, balabaqsha 1985 jyly salynǵan burynǵy ǵımaratynyń bazasynda jańadan boı kóterip jatyr.
Oblys ákimi «Týǵan jer» alleıasyna da bardy. Abattandyrylǵan alleıa 2018 jyly KTK-K kompanııanysynyń qarajatyna salynǵan. Demalys ornynyń jalpy aýdany 6 myń tekshe metrden asady. Munda kelýshiler Maqat aýdanynyń tarıhymen tanysa alady. Dástúrli ónerdi, ulttyq sport túrlerin nasıhattaý baǵytynda 3D kompozıtsııalar ornatylǵan. Alleıaǵa kelýshilerge Wi-Fi jelisine tegin qosylý múmkindigi de qarastyrylǵan.
Aımaq basshysy jańartylǵan Jeńis saıabaǵyna da bardy. Memleket basshysynyń «Rýhanı jańǵyrý» baǵdarlamasy aıasynda ótken jyly Jeńis saıabaǵyna kúrdeli jóndeý jumystary júrgizilgen bolatyn. Mármár taqtada aýdannan ekinshi dúnıejúzilik soǵysqa attanyp, oralmaǵan 1 625 bozdaqtyń esimderi jazylǵan.
